27.10.2023

türkiye awazi radiyosi: «hörriyet» géziti: «erdoghan yawropa ittipaqigha naraziliq bildürüp: urush toxtitish üchün yene qanche bala ölüshi kérek? (dédi)» serlewhilik xewiride, israiliyening ghezzege qaratqan hujumlirigha naraziliq bildürgen jumhur reis rejep tayyip erdoghanning yawropa ittipaqigha xitab qilip: «urush toxtitish chaqiriqi élan qilish üchün, ghezzege yene qanche tonna bomba chüshüshi, yene qanche bala ölüshi kérek?!» dégenlikini  oqurmenliri bilen ortaqlashti.

«star» géziti: türkiye jumhuriyiti sehiye ministiri fahrettin kojaning dunya sehiye teshkilati bash diréktori tédros adanom gébréyusqa mektup yollap: «dunya sehiye teshkilatining rehberlik mesuliyitini tonup, jiddiy tedbirlerni qollinish arqiliq ghezzediki saghlamliq mulazimitining bixeterlikige kapaletlik qilish»qa chaqirghanliqini yazdi.

«xabertürk» géziti: «erdoghan: biz türkmenistanning toluq ezaliqini körüshni xalaymiz (dédi)» serlewhilik xewiride, jumhur reis erdoghanning türkmenistan pirézidénti serdar berdimuhemmedow bilen ötküzgen qoshma muxbirlarni kütüwélish yighinida söz qilip: «türk döletliri teshkilatining közetküchi ezasi bolghan türkmenistanni aile kéngishimizning toluq ezasi süpitide körüshni xalaydighanliqimizni tekitleymen» dégenlikini oqurmenlirining diqqitige sundi.

«sabah» géziti: türkiye jumhuriyiti sanaet we téxnika ministiri mehmet fatih kachirning, türkiyening herbiy uchquchisiz ayropilan ishlepchiqirishta dunyada birinchi orunda turidighanliqini élan qilghanliqini xewer qildi.

«yéngi shepeq» géziti: «(türkiyening) yerlik küreshchi ayropilani — qaghan (KAAN)ning bu yilqi tunji uchushidin ilgiriki halqiliq basquchlarning birini muweppeqiyetlik tamamlighanliqini yazdi.