17.10.2023

türkiye awazi radiyosi: «star géziti», türkiye jumhur reisi rejep tayyip erdoghanning tünügün (16-öktebir) iran pirézidénti ibrahim reisi, engliye bash weziri rishi sunak we girétsiye bash ministiri kiryakos michotakis bilen téléfonda körüshkenlikini xewer qildi.

xewerde, rejep tayyip erdoghanning iran pirézidénti reisi bilen körüshkende, ottura sherqte jiddiychilikni téximu kücheytiwétidighan qedemlerdin yiraq turushni tekitligenliki qeyt qilindi.

xewerde, rejep tayyip erdoghanning engliye bash weziri rishi sunakqa, yillardin buyan pelestinge bérilgen wedilerning xatirilinishi we orunlinishining muhim ikenlikini éytqanliqi bildürüldi.

xewerde yene, rejep tayyip erdoghanning girétsiye bash ministiri michotakis bilen körüshkende, kishilik hoquqqa xilapliq qilishni toxtitish üchün tirishchanliq körsitip, bu toghrida dunyagha signal bérish kéreklikini, naraziliqlarni kücheytidighan emes, belki azaytidighan qedmlerni baldurraq tashlashning toghra ikenlikini eskertkenliki bildürüldi.

«sabah géziti», tashqi ishlar ministiri xaqan fidanning isirailiye-hamas toqunushi bashlinip uzun ötmeyla qanat yaydurghan diplomatik paaliyetlirini dawamlashturuwatqanliqini xewer qildi.

xewerde, ministir xaqan fidanning bu qétim hamas rehbiri ismail haniyye bilen téléfonda körüshüp, puqralarni qoyup bérish mesilisini muzakire qilghanliqi qeyt qilindi.

«hörriyet géziti», adalet we tereqqiyat partyesining bayanatchisi ömer chelikning isirailiye-ghezze weqelirige tutqan pozitsiyesini qattiq tenqid qilghanliqini xewer qildi.

«weten géziti», türkiye büyük millet mejlisi (parlaménti) ning bashliqi numan qurtulmushning 1967-yili belgilengen chégralar boyiche musteqil, birleshken, igilik hoquqluq we paytexti quddus bolghan pelestin dölitining qurulushi üchün tirishchanliq körsitilishi kéreklikini tekitlep, «peqetla qeghez üstide bolghan, mehelle-mehelle bölünüp ketken pelestin emes, belki zémin pütünlüki kapaletke ige bolghan pelestinning qurulushi hem islam dunyasining asasliq wezipiliridin hemde ottura sherq tinchliqining eng asasliq shertliridin biri» dégenlikini xewer qildi.

«xeber türk géziti»,  qatnash we ul-eslihe ministiri abdulqadir uraloghluning tünügün élan qilghan bayanatida, «6A -türksat» süniy hemrahining barliq sinaqlirining muweppeqiyetlik bolghanliqini eskertip, 2024-yili iyun éyida alemge qoyup bérilidighanliqini  bildürgenlikini xewer qildi.