ilham eliyéw lachin karidori heqqide muhim söz qildi

türkiye awazi radiyosi xewiri: ezerbeyjan pirézidénti ilham eliyéw sowét ittipaqi mezgilide erméniyedin qoghlanghan ezerbeyjanliqlar teripidin qurulghan <gherbiy ezerbeyjan jemiyiti> ezasi bir türküm ziyaliylar bilen körüshti.

eliyéw uchrishishta qilghan sözide, lachin karidorida yüz bergen ishlarning ezerbeyjangha qarshi hewes peyda qilghanliqini, erméniye we uning arqisidiki bashqa döletlerning ezerbeyjangha qarshi töhmet chaplash seperwerliki bashlighanliqini éytti.

eliyéw birleshken döletler teshkilatidimu ezerbeyjangha qarshi yéngi ighwagerchiliklerning teyyarlanghanliqini, bir qanche kündin buyan bezi döletlerning ezerbeyjangha qarshi paskina pilanlirini yolgha qoyushni qarar qilishqanliqini bildürdi.  

eliyéw mezkur döletlerning muweppeqiyetke érishelmigenlikini, emma kéler hepte buninggha yene urunup béqishidighanliqi mumkinlikini tekitlep, «lachin yolida yüz bergen weqe qoyashtek éniq. bu bizning qanunluq hoquqimizdur. tebiiy bayliqlirimiz ishlitilmekte we yötkep kétilmekte. tebiiy bayliqlirimizni shümüriwatqanlar xelqara qanun boyiche jinayetchidur. chünki bu yer xelqara teripidin <bizning zéminimiz> dep étirap qilinghan. dölet organlirimiz wekillirining u yerdiki kanlarni tekshürüshi toghruluq heqqaniy telepimiz bar. néme ish boluwatqanliqini körüshi we qanunsiz paaliyetlerni toxtitishi lazim. bu bizning heqliq telipimizdur» dédi.

ezerbeyjan ermenistan nopusi zich yashaydighan we rusiye (tinchliq saqlash) qisimliri waqitliq orunlashturulghan ezerbeyjan zéminidiki kanlarning qanunsiz paaliyetlirini tekshürüsh, kontrol qilish we buning netijiside muhitqa yetküzülgen ziyanni éniqlash meqsitide 10 - dékabir rayongha mutexessisler etritini  ewetken, emma ermenler teripidin tosqunluqqa uchrighan idi.   

bu ehwalgha qarita ezerbeyjanning muhit asrash ammiwi teshkilatliri ezaliri we paaliyetchiler ezerbeyjan zéminidiki kanlarning qanunsiz paaliyet qilishining aldini élishni telep qilip, 12 -  dékabirda lachin karidorida namayish bashlighan idi.