سودا مىنىستىرى مەھمەت مۇش ئەزەربەيجان ۋە گىرۇزىيە سودا مىنىستىرلىرى بىلەن كۆرۈشتى

تۈركىيە ئاۋازى رادىيوسى خەۋىرى: مەھمەت مۇش ئەزەربەيجاننىڭ پايتەختى باكۇدا ئۆتكۈزۈلگەن تۈركىيە-ئەزەربەيجان-گىرۇزىيە 6-نۆۋەتلىك سودا مۇنبىرى يىغىنىدىن كېيىن، مىكايىل جاباروۋنى ئىشخانىسىدا زىيارەت قىلدى.

مىنىستىر مەھمەت مۇش ئۇچرىشىشقا ئالاقىدار تىۋىتتېر ھېسابىدا ھەمبەھىرلىگەن ئۇچرىدا، ئۇچرىشىشنىڭ ئۈنۈملۈك بولغانلىقىنى ۋە ئىككى تەرەپ سودا مۇناسىۋەتلىرى، دۆلەتلەر ئوتتۇرىسىدىكى ئەۋزەل سودا كېلىشىملىرى، مەبلەغ سېلىش، ھۆددىگەرلىك كەسپى ۋە ئەشيا ئوبوروتى قاتارلىق تېمىلارنى مۇزاكىرە قىلغانلىقىنى بىلدۈردى.

مىنىستىر مەھمەت مۇش ئاندىن گىرۇزىيەنىڭ ئىقتىساد ۋە سىجىل تەرەققىيات مىنىستىرى تۇرناۋا بىلەن كۆرۈشتى.

مەھمەت مۇش ئۇچرىشىشقا ئالاقىدار تىۋىتتېر ھېسابىدا ھەمبەھىرلىگەن ئۇچرىدا: «ئەركىن سودا كېلىشىمىنىڭ دائىرىسىنى كېڭەيتىش، مۇلازىمەت سودىسى، باكۇ-تىبلىس-قارس تۆمۈر يولى ھەمكارلىقى ۋە تاموژنا مەسىلىسى قاتارلىق كۈنتەرتىپتىكى مۇھىم تېمىلارنى مۇزاكىرە قىلدۇق» دېدى.