akar: özbékstan bilen muhim ilgirileshlerni qolgha keltürduq
türkiye dölet mudapie ministiri hulusi akar özbékstan bilen bolghan munasiwetlerde muhim ilgirileshlerning qolgha keltürülgenlikini éytti.
türkiye awazi radiyosi xewiri: türkiye dölet mudapie ministiri hulusi akar pakistan we qazaqistan ziyaritini axirlashturup, bügün (2020-yili 27-öktebir) resmiy ziyaret üchün özbékstan paytexti tashkentke yétip keldi.
hulusi akar özbékstan dölet mudapie ministirliqida ministir bahadir qurbanow teripidin murasim bilen kütüwélindi. murasimdin kéyin, heyetler ara uchrishish ötküzüldi. hulusi akar bu yerde söz qilip, ikki dölet otturisidiki munasiwetlerge zor ehmiyet bergenliklirini bildürdi. u mundaq dédi:
«her sahe boyiche munasiwetlirimizni tereqqiy qildurush üchün gheyret qiliwatimiz. buning ichide, soda, iqtisad, ijtimaiy, siyasiy munasiwetler bilen, elbette herbiy munasiwetmu bar. bu munasiwetlerde muhim ilgirileshlerni qolgha keltürduq.»
özbékstan dölet mudapie ministiri bahadir qurbanow türkiye bilen özbékstanni, tili we diniy oxshash qérindash ikki dölet dep teriplep mundaq dédi:
«döletlirimiz otturisida téz tereqqiy qiliwatqan munasiwetlerge tayanghan halda herbiy munasiwetlirimizmu téz tereqqiy qiliwatidu.»
heyetler ara uchrishishtiki özara söhbetlerdin kéyin, axbaratqa yépiq shekilde dawamlashqan uchrishishta, akar bilen qurbanow herbiy maliye hemkarliq kélishimi we neq pul yardimi kélishimi imzalandi.
hulusi akar özbékstan dölet mudapie minstiri bahadir qurbanow bilen bolghan uchrishishidin kéyin, özbékstan xewpsizlik kéngishining bash katipi wiktor mehmudow bilen körüshti.
u körüshüshte, herbiy telim-terbiye we mudapie sanaiti sahesidiki mewjut munasiwetlerni téximu kücheytken halda dawamlashturushning zörür ikenlikini tekitlidi.
