gérmaniyede üch türk xatirilendi

türkiye awazi radiyosi xewiri: 1992-yili 23-noyabir gérmaniyening möln shehiride, arslan ailisining öyige natsistlar teripidin ot qoyup bérilgen idi. weqede, bahide arslan, yeliz arslan we ayshe arslan hayatidin ayrilghan idi.

mezkur qanliq weqe yüz bergenlikining 24-yilliqida, insaniyetke qarshi jinayet hésablinidighan irqiy ayrimichiliqni eyiblesh we bu xil xainlarche hujumlarni untumasliq üchün hamburgdiki türkiye konsulxanisi bilen möln sheherlik hökümiti birlikte xatirilesh murasimi ötküzdi. paaliyette, aldi bilen diniy ishlar türk islam birliki (DİTİB) ge qarashliq fatih sultan jameside quran tilawet qilindi. arqidin hamburgdiki türkiye konsuli mehmet fatih aq, möln sheher bashliqi yan wigéls, nurghunlighan gérmaniyelikler we türkler ot qoyup bérilgen arslan ailisining öyi aldigha kélip gülchembirek qoydi.

hamburgda turushluq türkiye konsuli mehmet faatih aq, mölnde yüz bergen bu hujumni eslep turushning muhimliqini eskertip, natsistlarning türklerge qaritilghan hujumlirining, gérmaniyediki türk jemiyetlirining endishelirini kücheytiwatqanliqini éytti. u: «nahayiti epsuski, gérmaniyede bu weqe bilen 2015-2016-yilliri yüz bergen hujum qilish weqelirini köz aldimizgha keltürginimizde, bizni küchlük endishe qilishqa ittiridu» dédi.

hamburgda yashawatqan bahide arslanning oghli faruq arslan, uzun yillardin buyan gérmaniye dairilirining ashqun ongchilarning tehditini körmeske sélip kelgenlikini, natsistlargha qarshi küreshte aldi bilen bu heqiqetni qobul qilish kéreklikini éytti.

möln weqesi gérmaniyede natsistlar teripidin peyda qilinghan tunji irqiy ayrimichiliq xaraktéridiki ot qoyush weqesi bolup tarixqa yézilghan idi.