firansiye dunya longqisini qolgha keltürdi
firansiyening 2018-yilliq xelqara putbol fédératsiyeliri birleshmisi (FIFA) dunya longqisining hel qilghuch musabiqiside kirodiyeni 2 ge qarshi 4 netije bilen yingip chémpiyonluqni qolgha keltürgenliki, memliket miqyasida jushqunluq keypiyat ichide tebriklendi.
türkiye awazi radiyosi xewiri: rusiyening sahibxanliqida ötküzülgen 2018-yilliq dunya longqisining hel qilghuch musabiqisi 15-iyul firansiye komandisi bilen kirodiye komandisi otturisida élip bérildi. firansiye xelqi qattiq bixeterlik tedbirliri astida parizh, lion, bordéks, rénnés, nantés, monppélliyér, nays, marsilya qatarliq chong sheherlerdiki meydanlargha ornitilghan chong téléwizor ékranlirida musabiqini kördi.
aridin 20 yil ötkendin kéyin dunya longqisini muzéyigha qoyushqa muyesser bolghan firansuz xelqi, 90 minutluq musabiqining axirlishishi bilen kochilarni liq toldurup, hayajan bilen tebriklidi we "teshekkürler kök maykiliqlar", "biz dunya chémpiyoni" dep shoar towlidi.
firansiyening simwolliridin éfil munarining aldidiki chemp dé mars meydanigha ornitilghan téléwizor ékranlirida 90 minutluq musabiqini körgen putbol heweskarliri, dölitining bayraqlirini lepilditip, xushalliq minutlarni bashtin kechürdi. ular ghelibini tebriklesh üchün her xil paaliyetlerni qildi.
parizhdiki dunyagha dangliq chemps élsi kochisidimu dunya longqisi chémpiyonluqining hayajanliq tebriklesh paaliyetliri bar idi. bu yerdimu putbol heweskarliri firansiyening ghelibisini bayraqlarni lepilditip we naxsha-ussul oynap tebriklidi.
firansiye döletlik putbol komandisining tirénéri didiyér déschemps musabiqidin kéyin bayanat élan qilip, bu muweppeqiyetni qolgha keltürüshning asan emeslikini we komanda namida intayin xushal ikenlikini bildürdi. u: "putbolchilar üchün éytqanda, intayin chong chémpiyonluqtur" dédi.
firansiyening bir qanche tonulghan siyasetchilirimu dölet tarixidiki ikkinchi qétimliq chimpiyonluqni qolgha keltürüshning xushalliqini xatirilep, ijtimaiy taratqularda uchur hembehirlidi.
firansiye pirézidénti makron döletlik putbol komandisigha teshekkür éytti. bash ministir filippé bolsa: "firansiye dunya chémpiyoni, néme dégen qaltis musabiqe he! dunya longqisi néme dégen güzel! néme dégen qaltis komanda! siler dölitimizning sheripi, yashap kétinglar!" dégen uchurini hembehirlidi.
firansiye tashqi ishlar ministiri lé jriyan firansiyening ghelibisini tebriklesh üchün nurghunlighan döletlerning tashqi ishlar ministirlirining téléfon qilghanliqini bildürdi.
