تۈرك چېيى

تۈركىيەنىڭ دۇنيادىكى چاي ئەڭ كۆپ ئىستېمال قىلىنىدىغان دۆلەت ئىكەنلىكىنى بىلەمسىز؟

گەرچە تۈركىيە چاينىڭ ئانا ۋەتىنى بولمىسىمۇ، ئەمما چاينىڭ تۈركىيەدە ئەڭ ياقتۇرۇپ ئىستېمال قىلىنىدىغانلىقىدا قىلچە شەك يوقتۇر. دۇنيا چاي كومىتېتى خىتايدا تەييارلىغان دوكلاتنىڭ نەتىجىسىگە قارىغاندا، تۈركىيەدە كىشى بېشىغا 3.5 كىلوگىرام چاي توغرا كېلىدىكەن. تۈركىيە دۇنيا بويىچە  چاي ئىستېمال قىلىدىغان دۆلەتلەر ئىچىدە بىرىنچى ئورۇندا، دۇنيا بويىچە چاي ئىشلەپچىقىرىشتا بولسا بەشىنچى ئورۇندا تۇرىدىكەن…

گەرچە تۈركلەر چاي بىلەن ئوتتۇرا ئاسىيادا تونۇشقان بولسىمۇ، لېكىن چاينىڭ ئانادولۇغا كېلىشىگە ئۇزۇن ۋاقىت كەتكەن. چاي ئىچىش 19-ئەسىرنىڭ كېيىنكى يېرىمىدىن كېيىن ئانادولۇدا كەڭ ئومۇملاشقان. مۇشۇنداق بولۇشىغا قارىماي، ئوسمانلى ئىمپېرىيەسىدە چاينىڭ ئورنىغا قەھۋە ئىچىش مەدەنىيىتى كەڭ ئومۇملاشقان، ئەمما ئۇرۇشلار سەۋەبىدىن خەلق قىممەت باھالىق ۋە تېپىش قىيىن بولغان قەھۋەدىن مەھرۇم بولۇشقا باشلىغان. تۈركىيە جۇمھۇرىيىتىنىڭ ئېلان قىلىنىشىدىن كېيىن، مۇستاپا كامال ئاتاتۈرك، تېخىمۇ ئەرزان ۋە ئاسان تاپقىلى بولىدىغان ​​چاينىڭ تۈركىيەدە ئىشلەپچىقىرىلىشىنى تەشۋىق قىلغان. 1924-يىلى دۆلەت تەرىپىدىن رىزە ۋىلايىتىدە چاي ئىشلەپچىقىرىش توغرىسىدا قانۇن ماقۇللانغان ۋە رايوننىڭ تەرەققىي قىلىشىغا ئەگىشىپ، تۈركىيە چاي ئىشلەپچىقىرىش ۋە ئىستېمال جەھەتتە دۇنيادا كۆزگە كۆرۈنەرلىك سەۋىيەگە يەتكەن.

بۈگۈنكى كۈندە، تۈركلەر ئۈچۈن چاي پەقەت ئىچىملىك ​​بولۇپلا قالماي، كۈندىلىك تۇرمۇشتىكى ئاساسلىق ئىجتىمائىيلىشىش ۋاسىتىسى ھېسابلىنىدۇ. چاي ئىكرام قىلىش ۋە بىرلىكتە چاي ئىچىش دوستلۇق، مېھماندوستلۇق ۋە ھۆرمەتنىڭ نامايەندىسىدۇر. كۈندىلىك تۇرمۇشتا سۇدىن قالسا ئەڭ كۆپ ئىستېمال قىلىنىدىغان ئىچىملىك ​​بولغاندىن باشقا، ئائىلە ئەزالىرى ياكى مېھمانلارنىڭ بىر يەرگە جەم بولۇپ ، ئورتاق قىممەت قاراشلىرىنى ئورتاقلىشىدىغان ئالاھىدە كۈن، مۇراسىم ۋە پائالىيەتلەردىمۇ چاي ئىكرام قىلىنىدۇ.