giruziye bash ministiri irakli garibashwilining enqere ziyariti

giruziye bash ministirining türkiye ziyariti

 abdresul ishaqow

 2021-yili, 1 – iyun küni,  jumhur reis rejep tayyip erdoghanning teklipige binaen, giruziye bash ministiri irakli garibashwili bash ministir süpitide tunji qétim türkiyede ziyarette boldi. ziyaret heyitidin, iqtisad, diplomatiye we muhit asrash ishliri ministirliri, adjara mesuli qatarliqlarmu orun aldi. jumhur reis rejep tayyip erdoghan bash ministir garibashwilini enqerede resmiy murasim arqiliq qarshi aldi. uchrishishtin kéyin, rehberler axbarat élan qilish yighini ötküzdi. uchrishishning nahayiti muweppeqiyetlik ötkenlikini éytqan irakli garibashwili, jumhur reis erdoghanni tiflisqa teklip qildi.

türkiye texminen 15 yildin buyan giruziyening eng chong soda shériki bolup kelmekte. rehberler axbarat élan qilish yighinida, ortaq soda miqdarini 3 milyard dollargha yetküzüsh mesiliside ortaq tonush hasil qilghanliqlirini bildürdi. türkiye bilen giruziye sherq-gherb tiransportida tranzit döletler bolush süpitide téximu köp hemkarliq ornitish ewzelliklige ige. hetta zéngézor karidorining échilishimu, türkiye-giruziye-ezerbeyjan qatnash karidorining muhimliqini yoqatmaydu.

türkiye bilen giruziye sehiye sahesidimu hemkarliqni kücheytishte muhim rol oynaydighan paaliyetlerni élip barmaqta. may éyining axirida, ikki döletning sehiye xedimliri otturisida eza köchürüsh opératsiyesi mesilisi toghruluq hemkarliq kélishimi imzalandi. giruziyede eza köchürüsh opératsiyesining keng omumlishishida türkiye hemkarliq we maslashturush idarisi nahayiti zor tirishchanliq körsetti.

erméniyening rayon döletliri bilen bolghan munasiwetlirini normallashturushi we rayonluq bir gewdilishishke daxil bolushida giruziye ijabiy rol oynishi mumkin. giruziye bash ministiri garibashwili türkiyege kélishtin burun baku we ériwanda ziyarette boldi. jumhur reis erdoghanning «biz rayonda üch terep hemkarliqini qollaymiz» we «giruziye rayonluq hemkarliqining achquchi» teriqisidiki bayanatliri, bu nuqtida nahayiti zor ehmiyetke ige. türkiye-ezerbeyjan-giruziye-iran tashqi ishlar ministirliri yighinigha erméniyening qatnishishining ishqa ashurulushi, rayonluq tinchliq we muqimliqni ishqa ashurush yolida tashlanghan muhim  bir qedem bolushi mumkin.

«kowid – 19» yuqumi sewebidin ikki dölet otturisida taqaq halette turuwatqan chégra éghizliri, 2021 – yili, 1 – iyun künidin bashlap qayta échildi. bu ehwal, ortaq soda hejmini ashurushni öz ichige alghan ikki tereplik munasiwetlerning tereqqiy qildurulushida türtkilik rol oynaydu. türkiye bilen giruziye, özara kimlik ​​bilenla sayahet qilish, tamozhnida qulayliq yaritip bérish we erkin soda kélishimi qatarliq ikki terep munasiwetlirining istiratégiyelik sewiyede dawamlishishigha zémin hazirlap béridighan qedemlerni alliqachan tashlap bolghanidi.

türkiye bilen giruziye otturisidiki bu yuqiri qatlamliq istratégiyelik hemkarliq, stalin dewride yurt - makanliridin qoghlanghan ahiska türklirining ana wetinige qaytishi mesilisining kelgüside ijabiy hel qilinishigha kapaletlik qilidu.

melum bolghinidek, giruziyening namaxwan rayonida bir türk shirkiti su éléktr istansiliri berpa qiliwatidu. uda alte aydin buyan, yerlik xelqning bir qismi bu  layihening maddilirining közdin kechürülüshini telep qilmaqta. 1 – iyun küni, türkiyege ziyaretke kelgen giruziye wekiller ömikide su éléktr istansiliri layihesi bilen biwasite munasiwetlik ministirlarning bar bolushi, bu mesilining terepler otturisida téz hel qilinidighanliqini körsitip béridu. su éléktr istansiliri qurulushi giruziye éhtiyajliq boluwatqan muhim sélinma layiheliridin biridur.

türkiye-giruziye munasiwetliride ezerbeyjan faktori diqqet qozghimaqta. türkiye-ezerbeyjan-giruziye tashqi ishlar ministirlirining üch terep uchrishishi ünümlük dawamlashturulmaqta. türkiye-ezerbeyjan-giruziye dölet bashliqliri yighini ötküzüldi. hazirgha qeder, baku-tiflis-jeyhan, baku-tiflis-qars, baku-tiflis-erzurum layiheliri bu üch dölet teripidin ishqa kirishtürüldi. türkiye-ezerbeyjan-giruziye soda munbiri yighini chaqirilmaqta. bularning hemmisi rayonluq hemkarliqini yéngi bir sewiyege yetküzgili bolidighanliqining ispatidur.