erdoghan mewlanani xatirilesh paaliyitide özara muhebbetni tekitlidi

türkiye awazi radiyosi xewiri: jumhur reis erdoghan konyadiki mewlana kültür merkizide ötküzülgen hezreti mewlananing 749 - yilliqini xatirilesh murasimida oqulghan uchurida, ulugh mutepekkur, mutesewwup we qelb sultani mewlana jelaliddin rumini allahtin rehmet tilesh bilen xatirilidi.

erdoghan uchurida, hezreti mewlananing qelblerge shingdürgen muhebbet otining aridin yette yérim esir ötken bolushigha qarimay, hazirmu qelblerni saplashturushni dawamlashturiwatqanliqini eskertip, «bolupmu rayonimizda toqunushlar ewj alghan bügünki künde hezreti pirimizning töwendiki nesihetlirige qulaq sélishimiz kéreklikige ishinimen: <achchiqlar muhebbettin tatliq bolidu, mis muhebbettin altungha aylinidu. muhebbettin qaynam-tashqinliq dugh sularmu saplishidu. dertler muhebbettin shipa tapidu. muhebbettin ölüklermu tirilidu. muhebbet bilen sultanlarmu qulgha aylinidu> shundaq, muhebbet medeniyitining mensupliri bolush süpitimiz bilen biz birinchi bolup, öz-ara muhebbetni ornitimiz, andin qoshnilirimizdin bashlighanche, biz pütkül insaniyetke muhebbet we söygining shundaqla köyümchanliqning tili bilen xitab qilimiz. hezreti mewlananing  yétekchilikide xuddi ötmüshtikige oxshashla kelgüsimiznimu muhebbet, köyümchanliq we ittipaqliq üstige qurup chiqimiz» dédi.