türkiye parlaménti kishilik hoquq komiti bashliqi: türkiye her xil til we shéwilerge ige chiqmaqta

türkiye awazi radiyosi xewiri: türkiye büyük millet mejlisi kishilik hoquqni tekshürüsh komitéti bashliqi (adalet we tereqqiyat partiyesi istanbul parlamént ezasi) mustapa yeneroghlu, türkiyening türkiyede istémal qiliniwatqan til we shéwilerge ige chiqiwatqanliqini éytti.

mustapa yeneroghlu,  21 – féwral xelqara ana til bayrimi munasiwiti bilen élan qilghan yazma bayanatida, türkiyede ijtimaiy xilmuxilliqning bir ipadisi bolghan kordche, lazche, erebche, suryaniche dégendek bir qatar til we shéwilerning mewjutluqini dawamlashturalishi üchün, institutlarning qurulghanliqini eskertti.

türkche til we medeniyet birikmilirini kelgüsi ewladlargha yetküzüshning zörüriyitige isharet qilghan yeneroghlu, chet ellerde yashawatqan türkler üchün, dini xadimlargha oxshashla til ögitish xadimliriningmu muhim ikenlikini qeyt qildi.

maarip ministirliqi we chet eldiki türkler we tughqan xelqler bashqarmisining türkche derslerning kéngeytilishi, sani we süpitining yuqiri kötürülüshi  yolidiki xizmetlirining süritini ashurghanliqini eskertken yeneroghlu, deslepki qedemde yéngi teyinlengen oqutquchilar arqiliq türkche derslirining kücheytilishining pilanliniwatqanliqini tekitlidi.

yeneroghlu, buninggha oxshash xizmetlerning tunji ewlad köchmenler bilen kéyinki ewladlarning saghlam alaqe ornitalishi nuqtisidin muhim ikenlikini sözlirige ilawe qildi.