uyghur ösmürler qazan xelqini hayajangha saldi

türkiye awazi radiyosi xewiri: türkiyede aktip paaliyet élip bériwatqan uyghur ammiwiy teshkilatliridin «sherqiy türkistan maarip we hemkarliq jemiyiti» ayallar kométiti mesuli munewwer öz uyghurning bashchiliqidiki 30 kishilik ösmürler gürüppisi 6 - ayning 13 - küni enqerening qazan nahiyesi teripidin orunlashturulghan uyghur kéchiliki iptar ziyapiti pirogrammisigha alahide teklip bilen qatnashti.

uyghur kéchiliki iptar ziyapiti pirogrammisigha, nahiye rehberliri, qazan xelqi we enqere uyghurliri bolup köp sanda kishi qatnashti.  

pirogramma uyghur ösmürlerning quran tilawiti bilen bashlandi. uyghur akadémik dotsént doktor erkin emet échilish nutiqida, uyghur rayonining nöwettiki weziyitidin melumat berdi.

arqidin uyghurche eneniwiy kéyimlirini kéyishken uyghur ösmürler uyghurche naxsha muzika, shéir we diniy ilahilerdin örnekler körsitip, qazan nahiyesining hakimi loqman ertürk ependi we keng ammining qizghin alqishigha érishti.

oyun axirlashqandin kéyin uyghur balilargha wakaliten oqutquchisi munewwer öztürk xanim qazan nahiyesining hakimi bilen xanimigha ayyultuzluq kökbayraq, doppa we xatire buyumi bilen birge kök renglik sharpa hediye qildi. sheher bashliqi we ayalimu  uyghur ösmürlerge oyunchuq sowgha qildi.

qazan nahiyesining hakimi loqman ertürk ependi pirogramma jeryanida muxbirlargha bergen bayanatida uyghurlar heqqide toxtilip, «biz uyghur türkliri qérindashlirimizning  tartiwatqan derd - elemlirini yéqindin közitip kéliwatimiz. biz qazan xelqiningmu uyghur xelqige chongqur söygümiz bar. uyghur xelqi bilen türk xelqining dostluqini kücheytish üchün bu yil istanbuldin uyghur balilarni teklip qilghan iduq. mana hazir qazan xelqige uyghur naxsha - ussulliridin örnekler körsitiwatidu» dédi.

xitayning uyghurlargha yürgüziwatqan diniy bésimliri üstidimu toxtalghan qazan nahiyesining hakimi loqman ertürk ependi: «xitayning diniy bésim siyasitini qobul qilishimiz mumkin emes. insanlarning diniy étiqadigha hörmet qilinishi lazim. hemme kishiler erkin yashayalaydighan bir dunya berpa qilishimiz kérek. men xitay dölitini uyghur qérindashlirimizning heq – hoquqigha toluq riaye qilishqa chaqiriq qilimen» dédi.

istanbulda aktip paaliyet élip bériwatqan «sherqiy türkistan medeniyet we hemkarliq jemiyiti» ayallar komitéti mesuli, uyghur tili mektipining oqutquchisi munewwer özuyghur xanim 30 neper uyghur ösmürlerdin teshkillengen guruppini élip enqerege kelgen bolup, u, bu qétimqi paaliyetning nahayiti yaxshi ötkenlikini bayan qildi.

enqerege 45 kilométir uzaqliqqa jaylashqan qazan nahiyesi 60 ming nopusqa ige bolup, türk dunyasi toghrisida dawamliq paaliyetler élip bérilidighan nahiyelerdin birsi hésablinidu.