seudi erebistan bilen yaponiye hemkarliq kélishimi tüzdi
seudi erebistan bilen yaponiye otturisida hemkarliq kéngishi quruldi.
türkiye awazi radiyosi xewiri: seudi erebistanning resmiy xewer agéntliqi (SPA) ning xewirige qarighanda, seudi erebistan text warisi shahzade muhemmed bin selman bilen yaponiye bash weziri kishida fumiyo sinliq tor yighinida körüshken.
körüshüshte, ikki rehber ghezze rayonidiki özgirishler, israiliyening 7-öktebir (2023) din buyan rayonda dawamlashturuwatqan hujumlirini toxtitish, ghezze rayonigha insanperwerlik yardemlirini yetküzüsh we xelqara jemiyetning musteqil pelestin dölitini étirap qilishigha kapaletlik qilish yolida körsitiliwatqan tirishchanliqlarheqqide muzakire élip barghan.
ikki terep munasiwetlirini tereqqiy qildurush pursetliri, rayonluq we xelqaraliq özgirishler, bu heqtiki paaliyetler toghriliqmu muzakire élip bérilghan körüshüshte, seudi erebistan bilen yaponiye otturisida hemkarliq kéngishi qurulghan.
yaponiye bash weziri kishida fumiyo seudi erebistanning öz dölitini xam néfit bilen muqim halda teminligenliki üchün seudi erebistangha minnetdarliq bildürgen, shundaqla riyadning xelqara néfit baziriningmu muqim halette paaliyetlirini dawamlashturushtiki we pakize énérgiye bilen teminlesh shirketlirini qollashtiki rehberlik rolini dawamlashturushini ümid qilidighanliqini bildürgen.
seudi erebistan text warisi shahzade muhemmed bin selman bolsa, dölitining yaponiyeni dawamliq xam néfit bilen teminlesh iradisining qetiylikini tekitligen. shundaqla dölitining yaponiye bilen pakize énérgiye qatarliq bashqa sahelerdiki hemkarliqni tereqqiy qildurushni nishan qiliwatqanliqini eskertken.
