iranda 28-iyun pirézidéntliq saylimi ötküzülidu
tik uchar chüshüp kétish weqeside qaza qilghan iran pirézidénti ibrahim reisining ornigha waqitliq wezipige teyinlengen birinchi muawin pirézidént muhemmed muxbir 28-iyun (2024) pirézidéntliq saylimi ötküzülidighanliqini jakarlidi.
türkiye awazi radiyosi xewiri: iran irna (IRNA) agéntliqining xewirige qarighanda, waqitliq pirézidént muhemmed muxbir pirézidéntliq saylimining waqtini békitish toghrisida parlamént bashliqi muhemmed bekir kalibaf we aliy sotning bashliqi gulamhüseyin muxsin ejei bilen körüshken.
körüshüshtin kéyin élan qilinghan bayanatta, pirézidéntliq saylimining 28-iyun ötküzülidighanliqi bildürüldi.
pirézidéntliq saylimigha kandidat bolmaqchi bolghanlar 30-maydin 3-iyunghiche bolghan ariliqta iltimas qilishi kérek.
saylam seperwerlik paaliyetliri 12-iyundin 27-iyun etigengiche élip bérilidu.
iranda pirézidént kandidatliri alte neper qanunshunas we alte neper fiqihshunastin teshkil tapqan asasiy qanunni qoghdighuchilar kéngishi teripidin testiqlinip, xelq teripidin saylinidu.
pirézidént ibrahim reisi 19-may (2024) tashqi ishlar ministiri hüseyin emir abdullahiyan we bir qisim emeldarlar bilen bille iran-ezerbeyjan chégrasida yasalghan su tosmisining échilish murasimigha qatniship qaytiwatqinida, tik uchar chüshüp kétip jénidin ayrilghan idi.
