ياۋروپا تۈركىيە بىلەن بولغان مۇناسىۋەتلەرنى ئىلگىرى سۈرۈشكە ئەھمىيەت بېرىدىغانلىقىنى تەكىتلىدى

تۈركىيە ئاۋازى رادىيوسى خەۋىرى: بېلگىيەنىڭ پايتەختى بىريۇسسېلدا داۋاملىشىۋاتقان ياۋروپا ئىتتىپاقى باشلىقلار يىغىنىنىڭ خۇلاسە دوكلاتىنىڭ تۈركىيە بىلەن بولغان مۇناسىۋەتلەرگە ئالاقىدار بۆلۈمى ئېلان قىلىندى.

باياناتتا: «ياۋروپا ئىتتىپاقىنىڭ شەرقىي ئاقدېڭىزنىڭ مۇقىم ۋە بىخەتەرلىكى ھەمدە تۈركىيە بىلەن بولغان ھەمكارلىق ۋە ئۆزئارا مەنپەئەت يەتكۈزۈش مۇناسىۋىتىنى تەرەققىي قىلدۇرۇشتا ئىستراتېگىيەلىك مەنپەئەتى بار» دېگەن ئىبارىلەرگە ئورۇن بېرىلدى.

باياناتتا يەنە: «ياۋروپا ئىتتىپاقى تۈركىيە بىلەن بولغان ھەمكارلىقنىمۇ ئىلگىرى سۈرىدىغان قىبرىس سۆھبەتلىرىنىڭ ئەسلىگە كېلىشى ۋە ئىلگىرىلىشىگە ئىنتايىن ئەھمىيەت بېرىدۇ» دېيىلدى.

ياۋروپا ئىتتىپاقىنىڭ بۇ مەسىلىنى ھەل قىلىشتا بىرلەشكەن دۆلەتلەر تەشكىلاتى (ب د ت) ھىمايىسىدىكى مۇساپىنى قوللايدىغانلىقى تەكىتلەنگەن باياناتتا: «ياۋروپا ئىتتىپاقى قولىدكى بارلىق مۇۋاپىق ۋاسىتىلەرنى ئىشقا سېلىپ، ب د ت ھىمايىسىدىكى بارلىق باسقۇچلارنى قوللاشقا تەييار» دېيىلدى.

ياۋروپا ئىتتىپاقى كېڭىشى رەئىسى چارلېز مىشېل بايانات بېرىپ: «بىز تۈركىيە بىلەن ئىجابىي مۇناسىۋەت ئورنىتىشنى، مۇقىم مۇناسىۋەتلەرنى تەرەققىي قىلدۇرۇشنى خالايمىز... مەن قىبرىس ۋەزىيىتىنىڭ ئىنتايىن مۇھىملىقىنى تەكىتلىمەكچىمەن. بىز قىبرىسنىڭ ئەھۋالىغا، بولۇپمۇ ب د ت نىڭ ھەل قىلىش مۇساپىسىگە ئالاھىدە قىزىقىمىز» دېگەنلەرنى قەيت قىلدى.