iranda hawa bulghinishi sewebidin tordin ders ötüsh dawamlashmaqta

türkiye awazi radiyosi xewiri: iran irna agéntliqining xewiride bildürülishiche, hawa bulghinishi sewebidin téhran we ispahan ishtatlirida üch kündin buyan yolgha qoyulghan torda ders ötüsh belgilimisi yene ikki kün uzartildi.

belgilime boyiche, yesliler taqaldi. bashlanghuch, ottura we toluq ottura mektepler, uniwérstétlar torda ders ötüshni dawamlashturdi.

paytext téhranda hawa bulghinish derijisining yuqiri bolushi sewebidin hawa bulghinish jiddiy ehwallar komitéti bir qatar tedbirlerni yolgha qoydi.

buninggha asaslanghanda, dézilni yéqilghu qilghan qatnash wastilirining kéche waqitliridimu sheher merkizige kirishi cheklinidu. bashqa motorluq qatnash wastiliri üchünmu charshenbe küni (6-dékabir) giche taq we jup plaka belgilimisi yolgha qoyulidu. sheherdiki barliq éléktr istansisilirida, sanaet tarmaqlirida, ishlepchiqirish séxlirida, kanchiliq we mulazimet kesipliride dézilni yéqilghu qilish cheklinidu.

ispahan ishtatidimu motorluq qatnash wastiliri üchün taq we jup plaka belgilimisi yolgha qoyulidu. alborz, éraq we simnan ishtatliri bilen sherqiy ezerbeyjan ishtatining tebriz, osku sheherliride torda ders ötüsh 6-dékabirmu dawamlishidu.

mezkur ishtatlarda, yürek, qan-tomur késellikliri, nepes yoli we sozulma xaraktérlik késellikliri bimarliri bilen dölet organlirida ishleydighan hamile bolghan ayallar xizmitini öyide intérnét arqiliq ishleydu.