amérikaning teneftiki herbiy bazisi hujumgha uchridi
iranning qollishi astidiki shie qoralliq küchliri süriyening tenef rayonidiki amérika herbiy bazisigha ikki uchquchisiz hawa apparati bilen hujum qildi.
türkiye awazi radiyosi xewiri: liwandiki hizbullah herikiti télégramma supisidiki adrésida, amérikaning süriyening jenubidiki bazisigha qilinghan hujum heqqide bayanat élan qilip: «iraqtiki islamiy qarshiliq körsitish firontining ikki uchquchisiz hawa apparati bilen süriyening tenef rayonidiki amérika herbiy bazisigha hujum qilghanliqi»ni uqturdi.
hizbullah 8 – öktebir élan qilghan bayanatida, israiliyening hamasqa qilghan hujumida «biterep» turmaydighanliqini we özlirining pelestinlik guruppilarni qollaydighanliqini élan qilghanidi.
arqidin, hizbullah bilen israiliye armiyesi otturisida liwanning jenubida toqunush yüz bergenidi.
bu özgirishler bilen birla waqitta, iranning qollishi astidiki iraq shie qoralliqlirimu özlirining hizbullah we hamas terepte turidighanliqini élan qilip, eger amérika urushqa arilashsa, amérikaning iraq we süriyediki orunlirigha zerbe béridighanliqini jakarlighanidi.
amérika dölet mudapie ministirliqi aldinqi künidiki bayanatida, 17- öktebirdin 26- öktebirgiche bolghan jeryanda, iraq we süriyediki amérika eskerliri we birleshme qisimlarning jemiy 16 qétim hujumgha uchrighanliqi qeyt qilinghanidi.
