amérika elchisi türkiye bilen girétsiyening ege déngizidiki sürkilishi toghrisida bayanat élan qildi
amérikaning enqerede turushluq bash elchisi fléyk, bizning natodiki ittipaqdashlirimiz türkiye we girétsiye bilen bolghan bixeterlik sahesidiki hemkarliqimiz, bir terepni qollash yaki tengpungluqni buzush pozitsiyesini asas qilmaydu» dédi.
türkiye awazi radiyosi xewiri: amérikaning enqerede turushluq bash elchisi fléyk, elchixanining ijtimaiy taratqudiki adrésida washingitonning ege déngizigha munasiwetlik pozitsiyesi toghrisida bayanat bérip: «yéqinda mendin amérikaning ege déngizining bixeterlikige munasiwetlik mesilidiki meydanida özgirish bolghan - bolmighanliqi soraldi. méning bu soalgha béridighan jawabim <yaq>. bizning natodiki ittipaqdashlirimiz türkiye we girétsiye bilen bolghan bixeterlik sahesidiki hemkarliqimiz, bir terepni qollash yaki tengpungluqni buzush pozitsiyesini asas qilmaydu» dédi.
bash elchi fléyk asasliq nishanning rayonning tinchliqi we bixeterlikige kapaletlik qilish ikenlikini tilgha élip: «hazirqi ortaq tirishchanliqimiz rusiyening ukrainadiki rehimsiz we orunsiz urushini axirlashturushqa merkezleshti. türkiye, bolupmu ashliq bixeterlikini ilgiri sürüp, rusiye bilen ukraina otturisidiki söhbetni chongqurlashturup, qimmetlik yardemlerni qilishni dawamlashturmaqta.
bizning girétsiye bilen bolghan mudapie hemkarliqimiz ukraina we natoning ottura we sherqiy yawropadiki ittipaqdashlirini qollash arqiliq natoning sherqiy qanitini kücheytmekte. bizning natodiki ittipaqdashlirimiz türkiye we girétsiye bilen ortaqlishidighan asasliq meqsitimiz pütkül rayonning tinchliqi, bixeterliki we muqimliqigha kapaletlik qilishtin ibaret» dégenlerni qeyt qildi.
