رۇسىيە پىرېزىدېنت بايدىننىڭ ئايالى ۋە قىزىغا ئېمبارگو يۈرگۈزدى

تۈركىيە ئاۋازى رادىيوسى خەۋىرى: رۇسىيە تاشقى ئىشلار مىنىستىرلىقى 25 ئامېرىكا پۇقراسىغا ئېمبارگو يۈرگۈزۈلگەنلىكى توغرىسىدا بايانات ئېلان قىلدى.

باياناتتا، ئامېرىكانىڭ رۇسىيە سىياسىي مۇتەخەسسىسلىرىگە ۋە جەمئىيەتكە خىزمەت قىلىۋاتقان كىشىلەرگە قارشى يۈرگۈزگەن ئېمبارگولارنى ئىزچىل ھالدا كېڭەيتكەنلىكى ئەسكەرتىلدى.

بۇنىڭغا جاۋابەن، رۇسىيە ھۆكۈمىتىنىڭ 25 ئامېرىكا پۇقراسىغا مۇددەتسىز ۋىزا چەكلىمىسى قويۇلغانلىقى تەكىتلەنگەن باياناتتا، ئېمبارگو يۈرگۈزۈلگەن كىشىلەرنىڭ ئىسملىكىنىڭ ئېلان قىلىنغانلىقى قەيت قىلىندى.

باياناتتا بىلدۈرۈلىشىچە، تىزىملىكتە رۇسىيەگە قارشى يۈرگۈزۈلگەن ئېمبارگولارغا مۇناسىۋەتلىك تەكلىپلەر سۇنغان «McFaul-Yermak» گۇرۇھىنىڭ ئەزالىرى، كېڭەش پالاتا ئەزالىرى ۋە ئۇنىۋېرستېت ئوقۇتقۇچىلىرى بار بولۇپ، بۇلاردىن باشقا، ئامېرىكا پىرېزىدېنتى جو بايدىننىڭ ئايالى ھەمدە قىزى ئاشلېي بايدىنمۇ بار ئىكەن.