amérika heyiti wénézuéla pirézidénti maduro bilen körüshken
wénézuéla pirézidénti nikolas maduro amérika heyiti bilen bir qétimliq «özara hörmet» we «semimiy» körüshüshni emelge ashurghanliqlirini éytti.
türkiye awazi radiyosi xewiri: wénézuéla pirézidénti nikolas maduro dölet téléwiziyeside bayanat élan qilip, her qachan diyalogqa ochuq ikenliklirini bildürdi.
u: «diplomatik körüshüsh boldi. texminen ikki saet sözleshtuq, men üchün ehmiyetlik témilar üstide yüzturane sözlishish intayin muhim» dédi.
u wénézuélaning iqtisadiy muqimliqi üchün barliq sahelerning wekilliri bilen qaytidin uchrishishlarning ötküzülgenlikini eskertip: «biz döletning diyalog musapisini döletning siyasiy, iqtisadiy we diniy amilliri bilen qaytidin janlandurushni qarar qilduq. biz téximu keng dairilik, téximu keng bolghan dölet diyalog musapisini qaytidin janlandurimiz» dédi.
u rusiyening 24-féwral ukrainagha qarshi qozghighan hujumi toghrisida toxtilip, urush dawamlashqan ehwalda pul paxalliqini kontrol qilish üchün bezi tedbirlerni yolgha qoyushqa mejbur bolidighanliqlirini eskertti.
u rusiyege yürgüzülgen émbargolarni tenqid qildi we: «énérgiye bahaliri, gaz, néfit, yémek-ichmek bahaliri we oghut bahaliri üstide baha tengpungsizliqi bar idi. hazir téximu yaman boldi. diyalog, muzakire, xewpsizlik kapaletlirige uyghun halda tinchliqqa mejburlaymiz» dédi.
ötken hepte amérikaning bir yuqiri derijilik heyitining maduro bilen paytext karakasta körüshkenliki toghrisida xewerler tarqalghan idi.
aqsarayning bu heqte élan qilghan bayanatlirida, körüshüshlerde énérgiye bilen teminlesh mesilisining küntertipke kelgenliki qeyt qilinghan idi.
