ئامېرىكا F-35C تىپلىق كۈرەشچى ئايروپىلانىنىڭ قالدۇقىنى چىقىرىش خىزمەتلىرىنى داۋاملاشتۇرماقتا

تۈركىيە ئاۋازى رادىيوسى خەۋىرى: ئامېرىكا دېڭىز ئارمىيەسى F-35C ئايروپىلانىنى دېڭىزدىن چىقىرىش خىزمىتىنىڭ ھەپتە ئاخىرىدا باشلانغانلىقىنى ئۇقتۇرغان بولسىمۇ، خىزمەتنىڭ قەيەردىن باشلانغانلىقى توغرىسىدا مەلۇمات بەرمىدى. ئەمما ياپونىيە دېڭىز قىرغىقى مۇھاپىزەت ئەترىتى قوماندانلىق ئورگىنىنىڭ، فىلىپپىننىڭ غەربىگە 185 دېڭىز مىلى كېلىدىغان جايدىكى خىتاي تەرەپ دېڭىز ئارمىيە بازىسى قۇرۇپ چىققان پاراسېل تاقىم ئاراللىرىنىڭ بىرى بولغان ۋودى ئارىلىنىڭ شەرقىگە 350 ئىنگلىز مىلى كېلىدىغان جايدا قالدۇق ئىزدەش خىزمەتلىرىنىڭ ئېلىپ بېرىلىۋاتقانلىقى توغرىسىدىكى ئاگاھلاندۇرۇشى، ئايروپىلان قالدۇقلىرىنى دېڭىزدىن چىقىرىش خىزمىتىنىڭ بۇ رايوندىن باشلانغانلىقى توغرىسىدىكى ئانالىزلارنىڭ ئوتتۇرىغا قويۇشىغا سەۋەب بولدى.

ئامېرىكا دۆلەت مۇداپىئە مىنىستىرلىقى باياناتچىسى جون كىربىي بۇ ھەقتە بايانات ئېلان قىلىپ، دۆلىتىنىڭ ئايروپىلاننىڭ قالدۇقلىرىنى چىقىرىش ئۈچۈن زۆرۈر تەدبىرلەرنى يولغا قويغانلىقىنى بىلدۈردى.

ئامېرىكانىڭ F-35C تىپلىق بىر كۈرەشچى ئايروپىلانى 24-يانۋار «كارل ۋىنسون» ناملىق ئامېرىكا ئاۋىياماتكىسىغا قونۇش ئەسناسىدا قازاغا ئۇچرىغان، ئۇچقۇچى ئاخىرقى پەيتتە سەكرىۋېلىش ئورۇندۇقىدىن پايدىلىنىپ قازادىن قۇتۇلۇپ قالغان، ئەمما ئاۋىياماتكىدىكى 7 خادىم يارىلانغانىدى.

ئايروپىلاننىڭ قالدۇقلىرىنىڭ خىتاينىڭ قولىغا چۈشۈپ كېتىشىنىڭ ئالدىنى ئېلىش ئۈچۈن رايوندا كەڭ كۆلەمدە بىخەتەرلىك تەدبىرلىرى يولغا قويۇلغانىدى.