nato mudapie ministirliri yighini 21 - öktebirde bashlinidu

türkiye awazi radiyosi xewiri: shimaliy atlantik ehdi teshkilati — natogha eza döletlerning dölet mudapie ministirliri 10-ayning 21-künidin 22-künigiche yawropa ittipaqining bélgiyening paytexti biryusséldiki bash orginida uchriship, afghanistan, rusiye, xitay we shimaliy atlantik ehdi teshkilati - yawropa ittipaqi munasiwiti qatarliq témilarni muzakire qilidu.

türkiyege wakaliten dölet mudapie ministiri xulusi aqar ishtirak qilidighan ikki künlük nato dölet mudapie ministirliri yighini 21-öktebir chüshtin kéyin bashlinidu.

bu yighin 6-aydiki natogha eza döletler bashliqlar yighini we ittipaq bu yil yazda afghanistandin chékinip chiqqandin kéyin ötküzülgen tunji nato mudapie ministirliri yighini bolushi nuqtisidin muhim hésablinidu.

yighinning afghanistangha munasiwetlik qismida, nato rayondin chékinip chiqqandin kéyinki eng yéngi ehwallar, afghanistanda qolgha keltürülgen netijilerning yoqilip kétishining aldini élish üchün qilishqa tégishlar ishlar, térrorluqqa qarshi turush kürishi qatarliq mesililer muzakire qilinidu.

natoning rusiyening natodiki wakaletxanisida wezipe ötewatqan sekkiz xadimning étirapnamisini bikar qilishi, arqidin rusiyening natoning moskwadiki paaliyetlirini toxtitishni qarar qilishidin kéyin peyda bolghan weziyet toghrisida pikir almashturulidu.

nato yéqinqi mezgillerde izchil tekitlep kéliwatqan we 6-aydiki nato bashliqlar yighinining bayanatidimu muhim orungha ige bolghan «xitayning qed kötürüshi» témisi nato mudapie ministirlirining küntertipide bolidu.

yighinning ikkinchi künide ministirlargha yawropa ittipaqining tashqi munasiwet we bixeterlik siyasiti boyiche aliy wekili josép borrélningmu qatnishishi mölcherlenmekte.