israiliye armiyesi refahqa kirdi

türkiye awazi radiyosi xewiri: israiliye armiyesining bu heqte élan qilghan bayanatida, refah rayonining misir bilen bolghan chégra éghizining ghezze teripining qolgha kirgüzülgenliki bildürüldi.

bayanatta, refah chégra éghizining misirdin texminen 3.5 kilométir yiraqliqqa jaylashqan pelestin teripidiki qismining pütünley israiliye armiyesining kontrolluqigha ötkenliki, hujum dawamida 20 pelestinlikning qaza qilghanliqi eskertildi.

gerche israiliye urush kabinéti tünügün kechte (6-may) hamasning qatar we misir teripidin sunulghan «urush toxtitish teklipliri» ni testiqlighanliqini élan qilghan bolsimu, emma ghezze rayonidiki sergerdan pelestinlikler panahliniwatqan refah rayonigha hujum qilishni dawamlashturushni qarar qilghanidi.

israiliye urush ayropilanliri we zembirekliri yérim kéchide refah shehirining sherqini qattiq bombardiman qilghanidi.

refah shehirining misir bilen chégralinidighan rayonlirida herbiy aptomobillarning körülgenliki bildürülgenidi.

israiliye armiyesi bügün etigenmu (7-may) refah rayonigha quruqluq hujumi qozghidi.

israiliye armiyesi tünügün etigen élan qilghan  bayanatida, mejburiy köchürüwétilgen pelestinlikler panahliniwatqan refahning sherqidiki bir qisim mehellilerning boshitilishini telep qilghanidi. shundin kéyin, nurghun pelestinlikler refah rayonidin qéchishqa bashlighanidi.

israiliyening 7-öktebir (2023) din buyan ghezze rayonida dawamlashturuwatqan hujumlirida kem dégende 14 ming 944 bala we 9 ming 849 ayalni öz ichige alghan 34 ming 735 pelestinlik jénidin ayrildi, 78 ming 108 pelestinlik yarilandi.

igilinishiche, xarabiliklerning astida yenila minglighan kishilerning jesetliri bar bolup, keng xelq ammisi panahliniwatqan doxturxanilar we maarip orunliri hujum nishani qilinip, ammiwi ul-esliheler weyran bolmaqta iken.