iran uran qoyuldurghanliqini élan qildi
iran hökümet bayanatchisi eli rebi yadro merkezliride %60 liktin 6.5 kilogiram, %20 liktin 108 kilogiram uran qoyuldurulghanliqini éytti.
türkiye awazi radiyosi xewiri: iran irna (IRNA) agéntliqining xewiride bildürülishiche, bayanatchi rebi 18-iyun (2021) ötküzülidighan pirézidéntliq saylimi yéqinlishiwatqanda ötküzülgen axbarat élan qilish yighinida, hesen ruhanigha qaritilghan tenqidlerge jawab berdi.
u hökümetni tenqid qilghanlarning irangha qarshi yolgha qoyulghan amérika émbargolirini körmeske séliwatqanliqini, émbargogha qarimastin her xil saheler boyiche nurghun muweppeqiyetlik qedemlerning bésilghanliqini bildürdi.
u iran atom énérgiyesi idarisining uran qoyuldurush xizmetliri üstide toxtilip, hazirghiche %60 qoyuldurulghan uran miqdarining texminen 6.5 kilogiramgha, %20 qoyuldurulghan uran miqdarining 108 kilogiramgha yetkenlikini eskertti.
u mezkur uran qoyuldurush xizmetlirining iran parlaménti békitken waqittin nahayiti qisqa waqit ichidila emelge ashqanliqini qeyt qildi.
u kélerki aylarda émbargolarning emeldin qaldurulushini ümid qilidighanliqlirini bildürüp, xelqni jüme küni (2021-yili 18-iyun) ötküzülidighan 13-nöwetlik pirézidéntliq saylimigha keng kölemde qatnishishini chaqiriq qildi.
u pirézidéntliq saylimigha namzat bolghan islahatchi siyasetchi muhsin mihralizadening saylamdin chékingenlikini uqturdi.
muhsin mihralizadening islahatchilargha yéqinliqi bilen tonulghan yene bir namzat abdunasir himmetni qollash üchün chékingenliki ilgiri sürülmekte.
