سابىق پىرېزىدېنت ترامپ ئامېرىكانىڭ ئافغانىستاندىن چېكىنىش قارارىنى ماختىدى

تۈركىيە ئاۋازى رادىيوسى خەۋىرى: سابىق پىرېزىدېنت دونالد ترامپ ئامېرىكا ئەسكەرلىرىنىڭ ئافغانىستاندىن چېكىنىش مۇساپىسى توغرىسىدا يازما بايانات ئېلان قىلدى.

ئۇ باياناتىدا: «ئافغانىستاندىن چىقىش قالتىس ۋە ئىجابىي ئىش. مەن 1-مايدا چېكىنىشنى پىلان قىلغان ئىدىم. ئىمكانىيەتنىڭ بېرىچە، مەزكۇر مۇساپىنى بۇ ۋاقىتقا يېقىن ھالدا ئەمەلگە ئاشۇرۇشىمىز كېرەك» دېدى.

ترامپ چېكىنىش مۇساپىسى ئۈچۈن بەلگىلەنگەن 11-سېنتەبىر كۈنىنىڭ ئامېرىكا تارىخى ئۈچۈن ماتەم كۈنى ئىكەنلىكىنى ۋە بۇ شەكىلدە داۋاملىشىشى كېرەكلىكىنى بىلدۈردى.

ترامپ 2020-يىلى فېۋرالدا تالىبان بىلەن تۈزۈلگەن كېلىشىمدە بەلگىلىك شارائىتلار ئاستىدا ئامېرىكا ئەسكەرلىرىنىڭ ئافغانىستاندىن 2021-يىلى 1-مايغىچە چېكىنىدىغانلىقى توغرىسىدا ۋەدە بەرگەن ئىدى. 2021-يىلى پىرېزىدېنتلىق ھوقۇقىنى تاپشۇرۇۋالغان جو بايدىن سانى 2 مىڭ 500 ئەتراپىدا بولغان ئامېرىكا ئەسكەرلىرىنىڭ چېكىنىش ۋاقتىنى 2021-يىلى 1-مايدا باشلاپ 11-سېنتەبىرگىچە ئاخىرلىشىدىغانلىقىنى ئېلان قىلغان ئىدى.

ئامېرىكا كونگرەسىدە دېموكراتلار پىرېزىدېنت بايدىننىڭ چېكىنىش پىلانىنى قوللىسا، جۇمھۇرىيەتچىلەرنىڭ كۆپ قىسمى «ئامېرىكانىڭ ئافغانىستاننى مۇئەللەقتە تاشلاپ قويغانلىقىنى» ۋە «ئۇ يەردە تېررورلۇقنىڭ قايتىدىن كۆپىيىدىغانلىقىنى» ئىلگىرى سۈرمەكتە.