رۇسىيە ب د ت  ئېكرانىدا كوسوۋا بايرىقىنىڭ كۆرىنىشىگە نارازىلىق بىلدۈردى

تۈركىيە ئاۋازى رادىيوسى خەۋىرى: ب د ت خەۋپسىزلىك كېڭىشىنىڭ توردا چاقىرىلغان كوسوۋا يىغىنىدا، رۇسىيەنىڭ ب د ت دا تۇرۇشلۇق دائىمىي ۋەكىلى دىمىترىي پوليانسكىي كوسوۋانى دۆلەت دەپ ئېتىراپ قىلمايدىغانلىقىنى بىلدۈرۈپ، كوسوۋا بايرىقىنىڭ ۋە تاشقى ئىشلار مىنىستىرى دونىكا گېرۋاللانىڭ ئېكرانىدا كۆرۈنىشىگە نارازىلىق  بىلدۈردى.

پولىيانسكىي ب د ت خەۋپسىزلىك كېڭىشىنىڭ 8 ئەزاسىنىڭ كوسوۋانى ئېتىراپ قىلمايدىغانلىقىنى تەكىتلەپ كوسوۋا دۆلەت بايرىقىنى ئېكراندا كۆرسەتمەسلىكىنى تەلەپ قىلدى.

رۇسىيەنىڭ بايراققا بىلدۈرگەن نارازىلىقى يىغىننىڭ بىر مەزگىل توختىتىلىشىغا سەۋەب بولدى.

ئاپرېلدا ب د ت خەۋپسىزلىك كېڭىشىنىڭ نۆۋەتچى رەئىسى بولغان ۋېيېتنام باش ئەلچىسى داڭ دىن كۇي بولسا، تور يىغىنىدا كوسوۋا بايرىقى كۆرۈنسە بولىۋىرىدىغانلىقىنى تەكىتلىدى ۋە ئۇزۇن ئۆتمەيلا يىغىننى قايتا باشلاتتى.

2008-يىلى 17-فېۋرالدا سېربىيەدىن ئايرىلىپ چىقىپ، ئۆز ئالدىغا مۇستەقىللىقىنى جاكارلىغان كوسوۋانى دۇنيادا جەمئىي 117 دۆلەت ئېتىراپ قىلىدۇ.