ئىران ئارمىيەسى ئۆز پاراخوتىنى ئۆزلىرى پاچاقلىغانلىقىغا دائىر خەۋەرلەرنى رەت قىلدى

تۈركىيە ئاۋازى رادىيوسى خەۋىرى: ئىران ئارمىيەسى باياناتچىسى شاھىن تاكىخانى ئىران ھەربىي تور بېتى «aja.ir» نىڭ زىيارىتىنى قوبۇل قىلىپ، بەرگەن باياناتىدا، كونارەك ئۇرۇش پاراخوتىنىڭ ئىران دېڭىز ئارمىيەسى  قوغدىغۇچى ئەترىتى تەرىپىدىن خاتا ھالدا پاچاقلانغانلىقىغا دائىر خەۋەرلەرنى رەت قىلىپ، «بۇ ۋە بۇنىڭغا ئوخشاش سۆزلەرنىڭ ۋەقە بىلەن ھېچ قانداق ئالاقىسى يوق. دۆلىتىمىزدىكى يەرلىك مەتبۇئاتلار بۇنداق تۇتۇرۇقسىز ئىشلارغا قىززىقماسلىقى كېرەك» دېدى.

تاكىخانى بۇ ۋەقەنىڭ پەقەت بىر ھادىسە ئىكەنلىكىنى تەكىتلەپ، مانېۋىردىكى ھادىسىنىڭ ھەر جەھەتتىن تەكشۈرۈلىۋاتقانلىقىنى بايان قىلدى.

ئىران تاراتقۇلىرى يەكشەنبە (يەنى 5-ئاينىڭ 10-كۈنى) ئىران دېڭىز ئارمىيەسىنىڭ باسرا قولتۇقىدىكى مانېۋىردا، ئېھتىياتسىزلىقتىن بىر ئۇرۇش پاراخوتىنى پاچاقلاپ تاشلىغانلىقىنى ۋە ئونلىغان كىشىنىڭ قازا قىلغانلىقىنى ئېلان قىلغان ئىدى.

ئىران ئارمىيەسىمۇ دۈشەنبە كۈنى ئېلان قىلغان باياناتىدا، بۇ ۋەقەنىڭ كونارەك ئۇرۇش پاراخوتىنىڭ ياردەمچى ئەترىتى كەلتۈرۈپ چىقارغان ھادىسە ئىكەنلىكىنى، 19 كىشىنىڭ قازا قىلغانلىقى ۋە 15 كىشىنىڭ يارىلانغانلىقىنى بىلدۈرگەن، بىراق ۋەقەنىڭ تەپسىلاتىنى ئاشكارىلىمىغان ئىدى.