ئامېرىكادا بىر ساقچى تىك ئۇچار ئايروپىلانى بىناغا سوقۇلۇپ كەتتى

تۈركىيە ئاۋازى رادىيوسى خەۋىرى: ساقچى باشلىقى ئارت ئاچېۋېدو تېكساس ئىشتاتىنىڭ ھوستون شەھىرىدە ئۇچقۇچى ۋە ئايروپىلان مۇلازىمەتچىسى ئولتۇرغان ساقچى تىك ئۇچار ئايروپىلانىنىڭ بىر تۇرالغۇ بىناغا سوقۇلغانلىقىنى ئېلان قىلدى.

ۋەقەدىن كېيىن ھەر ئىككى ساقچىنىڭ دوختۇرخانىغا ئېلىپ بېرىلغانلىقىنى بايان قىلغان ئاچېۋېدو، ئۇچقۇچىنىڭ قازا قىلغانلىقىنى ۋە مۇلازىمەتچىنىڭ ئەھۋالىنىڭ ئېغىر ئىكەنلىكىنى ئېيتتى.

ئاچېۋېدو بىنادا تۇرۇشلۇق ھېچ كىشىنىڭ يارىدار بولمىغانلىقىنى ھەمدە ۋەقەنىڭ سەۋەبىنىڭمۇ تېخىچە ئېنىقلانمىغانلىقىنى بىلدۈردى.