aljiriyediki namayishlar dawam qilmaqta

türkiye awazi radiyosi xewiri: aljiriye oqughuchiliri sabiq pirézidént abduleziz butéflika hakimiyiti wekillirining wezipisidin ayrilishi we uzun muddetlik islahatni telep qilip, paytextte we bashqa wilayetlerde her heptining seyshenbe künliri bashlighan namayishlarni dawamlashturmaqta.

minglarche oqughuchi aljiriye shehiride dölet miqyasida ikki aydin artuq waqittin buyan dawamlishiwatqan namayishlarning simwolighan aylanghan merkiziy pochtixana meydanigha qarap yürüdi. oqutquchilar we bashqa puqralarmu qatnashqan namayishta, waqitliq pirézidént abdulqadir bin salih we nureddin bedewi hökümitige qarshi shoarlar towlandi.

oqughuchilar, hakimiyette muresse terepdari, döletning hazirqi weziyitini asanlashturidighan bir kishini telep qilidighanliqlirini bildürüp, ramizan éyi boyiche namayishlarning dawam qilidighanliqini eskertti.

namayishchilar yene, bin salihning yéngi pirézidéntliq saylimi üchün élan qilghan 4-iyul künini qobul qilmaydighanliqlirini tekitlidi.

aljiriyening satif we béjaye qatarliq wilayetlerdiki uniwérstét oqutquchi-oqughuchilirimu namayish ötküzdi. nurghun kishi qatnashqan namayishlarda, butéflika hakimiyitining simwoli bolghan bezi kishilergimu naraziliq bildürüldi. xewpsizlik tarmaqliri namayish ötküzülgen jaylarda qattiq bixeterlik tedbirlirini aldi.

aljiriyede sabiq pirézidént butéflika texttin ayrildi, biraq namayishlar dawam qilmaqta. 20 yildin buyan hakimiyet béshida turghan butéflika 2019 -yili 2-aprél (seyshenbe) küni texminen 1 yérim ay dawamlashqan namayishlar we armiyening «agahlandurushi» netijiside istépa bergen idi.

butéflika palech bolup qalghan we chaqliq orunduqqa mehkum bolghan yéqinqi alte yilda, döletni eslide uning inisi seid butéflika, hakimiyet béshidiki dölet azadliq fironti, hökümetke yéqin soda-sanaetchiler guruhi we armiyediki bezi kishilerdin teshkil tapqan guruppining bashquruwatqanliqi déyiliwatqan idi. aljiriyelikler bu guruppini «küch» dep ataytti.

butéflika istépa bergendin kéyin, «küch» ning bir parchisi we butéflika hakimiyitining wekili dep qobul qilinghan döletning eng yuqiri ornidiki kishilerning hoquqidin ayrilishi toghrisidiki telep, aljiriye kochiliridiki keng kölemlik namayishlarda dawamliq tilgha élinmaqta.