beshshar esed küchliri yene puqralarni öltürdi
süriyede beshshar esed küchlirining paytext demeshqte «weziyiti tinjitilidighan rayonlar» din biri bolghan sherqiy gutadiki duma nahiyesige qilghan hujumida 6 puqra hayatidin ayrildi.
türkiye awazi radiyosi xewiri: öktichilerning kontrolluqidiki sherqiy guta puqrawi qoghdinish mesulliridin ehmed abdullahning éytishiche, beshshar esed küchlirining demeshqning sherqiy guta nahiyesige qilghan hujumida biri nariside bala, biri ayal bolup, jemiy 6 puqra hayatidin ayrilghan, 4 puqra yarilanghan. yaridarlar rayondiki dala doxturxanilirigha orunlashturulghan. hujum netijiside köp sandiki olturaq mehelliliri ziyangha uchrighan.
melumatlargha qarighanda, tok we su bilen teminlesh xizmiti toxtap qalghan sherqiy guta rayoni uda 5 yildin köprek waqittin buyan süriye armiyesining qorshawi astida bolup, rayon ahalisi tok éhtiyajini génératorlar arqiliq, su éhtiyajini bolsa quduqlar arqiliq qamdaydiken. beshshar esed küchliri kontrol nuqtiliridin insanperwerlik yardem buyumlirining kirishige ruxset qilmaywatqan sherqiy gutada yéqindin buyan yéterlik derijide uzuqlinalmasliq sewebidin nariside balilar köplep ölüp ketmekte iken.
türkiye, rusiye we iran 3 – 4 – may künliri chaqirilghan astana yighinida sherqiy gutani 4 toqunushmasliq rayonliridin biri dep élan qilghanidi. rusiye 22 – iyul sherqiy gutada urush toxtitish kélishimining ijra qilinishqa bashlighanliqini uqturghan bolsimu, biraq beshshar esed küchlirining rayongha qaratqan hujumliri arilap – arilap dawamlashmaqta.
