engliye térrorluq tehditini «pewquladde xewp» sewiyesige chiqardi

türkiye awazi radiyosi xewiri: manchéstér shehiridiki tenterbiye sariyida yüz bergen térrorluq hujumidin kéyin bixeterlik biyurokratiyesining ikkinchi qétimliq jiddiy ehwallargha taqabil turush kéngishi yighinigha riyasetchilik qilghan engliye bash weziri térizé mey, yighindin kéyin muxbirlarning soallirigha jawab bergende, dölettiki térrorluq tehditining «pewquladde xewp» sewiyesige chiqirilghanliqini éytti hemde zorawanning yalghuzmu yaki guruppa halitide heriket qilghanmu? buni éniqlap chiqish üchün dölet xewpsizlik küchliri bilen axbarat organlirining dawamliq tekshürüsh élip bériwatqanliqini tekitlep mundaq dédi: «herqandaq bir guruppining hujum bilen chétishliqi bar bolush éhtimalliqini nezerdin saqit qiliwételmeymiz.»

dölettiki térrorluq tehditi sewiyesini éniqlap chiqishqa mesul musteqil bir organ bolghan ortaq térrorluq analizi merkizining qolgha keltürülgen axbaratqa asasen tehdit sewiyesini yükseldürüshni qarar qilghanliqini eskertken mey, «bügünki tekshürüshlerge asasen dölettiki térrorluq tehditi sewiyesini <jiddiy xewp> tin <pewquladde xewp> ke chiqirish qarar qilindi. bu <herqandaq bir hujum yüz bérish éhtimalliqi bilenla cheklinip qalmaydu, eksiche  herwaqit hujum yüz bérish éhtimalliqi bar> dégen uqumni bildüridu» dédi.

térrorluq tehditining sewiyesini yükseldürüshning saqchilarning yéngi uchur menbelirige érishishi we tekshürüsh xizmitini muweppeqiyetlik halda tamamlishida türtklik rol oynaydighanliqini qeyt qilghan mey, saqchilarning bu dairide dölet mudapie wizaritidin qoralliq herbiy xadimlarni telep qilish hoquqi bérilishini telep qilghanliqini, wizaretningmu bu telepni maqullighanliqini uqturdi.

u yene, xelqni qoghdishi we jemiyet amanliqini saqlishi jeryanida saqchilar we dölet xewpsizlik küchlirige her türlük imkaniyetler we sharaitlarni yaritip béridighanliqlirinimu sözlirige ilawe qildi.

melumatlargha qarighanda, «pewquladde xewp» sewiyesi engliyediki térrorluq tehditi sewiyeliri arisidiki eng yüksek sewiye hésablinidiken.

düshenbe kéchisi manchéstér tenterbiye sariyining konsért zalida amérikiliq naxshichi Ariana Grande ning konsérti axirlashqandin kéyin yüz bergen bomba hujumida, köpinchisi balilardin teshkil tapqan 22 kishi qaza qilghan, 59 kishi yarilanghanidi.

saqchi terep selman ebidi isimlik 22 yashliq zorawanningmu partlash jeryanida ölgenlikini uqturghanidi.

bu ariliqta, térrorluq hujumining jawabkarliqini térrorluq teshkilati daésh öz üstige aldi.

daéshning bu heqte élan qilghan bayanatida, manchéstér tenterbiye sariyidiki hujumning partlatquch arqiliq élip bérilghanliqi eskertildi.

amérika axbarat menbeliri bolsa daésh bilen manchéstér hujumining héchqandaq munasiwitining yoqluqini uqturdi.