تەكشۈرۈش نەتىجىسى مۇسۇلمانلار سانىنىڭ سۈرئەت بىلەن كۆپىيىۋاتقانلىقىنى دەلىللىدى

تۈركىيە ئاۋازى رادىيوسى خەۋىرى: Pew نىڭ تەكشۈرۈش نەتىجىسىگە قارىغاندا، 2060 – يىلىغا بارغاندا دۇنيادىكى مۇسۇلمانلارنىڭ سانى خىرىستىيانلارنىڭ سانىغا تەڭلىشىپ قالىدىكەن.

2015 – يىللىق ئىستاتىستىكىلىق مەلۇماتلار بويىچە، خىرىستىيانلار دۇنيا نوپۇسىنىڭ %31 ىنى، مۇسۇلمانلار بولسا، %24 ىنى تەشكىل قىلىدۇ.

Pew تەرىپىدىن ئېلان قىلىنغان سانلىق مەلۇماتلار، 2060 – يىلىغىچە مۇسۇلمانلار سانىنىڭ 3 مىلياردقا يېتىپ، دۇنيا نوپۇسىنىڭ %31.1 ىنى تەشكىل قىلىدىغانلىقىنى كۆرسىتىپ بەردى. ئوخشاش مەزگىلدە خىرىستىيانلارنىڭ سانى 3 مىليارد 100 مىليونغا يېتىپ، دۇنيا نوپۇسىنىڭ %31.8 نى تەشكىل قىلىدىكەن .

2060 – يىلىغا بارغاندا دۇنيا نوپۇسىنىڭ 9 مىليارد 600 مىليونغا يېتىدىغانلىقىنى قەيت قىلغان Pew، بۇ جەرياندا دىنغا ئېتىقاد قىلمايدىغان ئىنسانلار نىسبىتىنىڭ %16 دىن %12 گە تۆۋەنلەيدىغانلىقى، ھىندۇلار بىلەن بۇددىستلار سانىنىڭ ئازىيىدىغانلىقى توغرىسىدىكى مۆلچەرىنىمۇ دۇنيا جامائەتچىلىكى بىلەن ئورتاقلاشتى.

تەكشۈرۈشتە، خىرىستىيان نوپۇسىنىڭ ئاستا خاراكتېرلىك كۆپىيىشى ئۆلۈش ۋە تۇغۇلۇش نىسبەتلىرىنى سېلىشتۇرۇش ئارقىلىق ئىزاھلاندى.