01.03.2021

türkiye awazi radiyosi: gérmaniye awazi radiyosi, siyasiy özgirishning insaniyetke qarshi jinayet ikenlikini bildürgen jumhur reis rejep tayyip erdoghanning «men (1997 – yili) 28 – féwralni bashtin kechürdüm, 28 - féwralni bilimen» dégenlikini anglighuchilirining diqqitige sundi.

gérmaniyening «br.de» tori, gérmaniye tashqi ishlar ministiri hayko maasning aldinqi hepte yawropa ittipaqi rehberliri birdeklik hasil qilghan waksina pasporti toghrisida toxtilip: «nahayiti téz ishlesh» kéreklikini éytqanliqini xewer qildi.

gérmaniyening «tagéshshau.dé» tori, amérikada Johnson&Johnson waksinisining ishlitilishige ruxset qilinghanliqi, bazardiki bashqa waksinalarning eksiche Johnson&Johnson waksinasini bir qétimla emleshning yéterlik ikenliki toghrisidiki uchurlarni oqurmenlirining diqqitige sundi.

liwanda chiqidighan «elmusteqbel» géziti, rusiyening bir tik uchar ayropilanining süriyede chüshüp ketkenlikini xewer qildi.

qatarda chiqidighan «erraye elqatariyye» géziti, birleshken döletler teshkilatining, 12 milyon 400 ming süriyelikning yémeklik teminatigha érishelmeywatqanliqini uqturghanliqini yazdi.

ispaniyening «xéraldo» géziti, xitayning üchinchi yuqum waksinisini testiqlighanliqini xewer qildi.

argéntinada chiqidighan «infobiya» géziti, rusiyening birla quta emlinidighan yuqum waksinisi «sputnik nur» ning «dunyagha échiwétilidighanliqi» ni élan qilghanliqini ilgiri sürdi.

wénézuélada chiqidighan «télésur» géziti, ispaniyelik namayishchilarning barsélonadiki chong namayishliri jeryanida ijtimaiy islahat élip bérilishini telep qilghanliqini yazdi.

rusiyening «woénno délo» zhurnili, türkiyening, rusiye éléktironluq urush sistémilirining, türkiyening uchquchisiz ayropilani — bayraqtar b 2 ni tosup qalalmaydighanliqini élan qilghanliqini xewer qildi.

rusiyening «ria nowosti» agéntliqi, amérikaning sabiq pirézidénti donald trampning, amérikaning rusiye néfitige béqinip qalidighanliqini ilgiri sürgenliki toghrisidiki uchurlarni oqurmenlirining diqqitige sundi.

rusiyening «wésti.ru» tori, kolléktip halette heriket qilalaydighan uchquchisiz hawa apparatlirining rusiye alem boshluqi qisimliri üchün xizmet qilidighanliqini xewer qildi.

firansiyening «firans-24» xewerler qanili, firansiyediki «puqralar kilimat kélishimi»ning hökümetke intayin nachar nomur bergenlikini ilgiri sürdi.

firansiyening «lé mondé» géziti, donald trampning otturigha chiqip (pirézidéntliqqa yéngidin namzat bolup ) qaytip kélish pikrini küntertipke kirgüzgenlikini xewer qildi.

firansiyening «lé figaro» géziti, parizh rayonining kowid  - 19 gha qarshi yéngi cheklesh tedbirlirini yolgha qoyushqa teyyarliq qiliwatqanliqini ilgiri sürdi.