صدارتی انتخابات کے دوران روسی شہریوں پر یوکرین کے حملوں کا ضرور جواب دیا جائیگا، پوتن

روسی صدر ولادی میر پوتن  نے کہا کہ یوکرین نے روس میں صدارتی انتخابات پر اثر انداز ہونے کے لیے شہری بستیوں پر حملہ کیا جس کی سزا  ضرور ملے گی۔

پوتن نے روسی سلامتی کونسل کے ارکان کے ساتھ ایک آن لائن میٹنگ کی۔

روسی وزیر دفاع سرگئی شوئیگو کے علاوہ حکومتی ارکان فیڈرل سیکیورٹی سروس (FSB) کے ڈائریکٹر الیگزینڈر بورتنیکوف اور روسی فارن انٹیلی جنس سروس (SVR) کے سربراہ سرگئی ناریشکن نے اجلاس میں شرکت کی۔

پریس کے لیے کھلے اجلاس کے ایک حصے میں اپنی تقریر میں، پوتن نے کہا کہ روس میں صدارتی انتخابات  کل  شروع ہوئے اور کہا، "کیف کی نیو نازی حکومت نے ووٹنگ کے عمل میں خلل ڈالنے کے لیے کئی مجرمانہ مسلح کارروائیوں کا منصوبہ بنایا ہے۔ وہ عوام کو ڈرانے دھمکانے  کے درپے  ہے۔ یہ روس  میں شہری آبادی والے علاقوں پر حملے کر رہا ہے۔

اس بات کی وضاحت کرتے ہوئے کہ یوکرین کی طرف سے داغے گئے 95 فیصد میزائل اور توپ خانے کو روسی فضائی دفاعی نظام نے تباہ کر دیا، پوتن نے کہا، "بدقسمتی سے، ہمارے ہاں شہری ہلاکتیں بھی ہوئی ہیں، ان کے اہل خانہ کو تمام ضروری امداد فراہم کی جائے گی۔ دشمن کے ان حملوں کا سخت جواب دیا جائیگا۔

پوتن نے کہا کہ یوکرین کی اسپیشل فورسز نے غیر ملکی کرائے کے فوجیوں کی مدد سے روسی سرزمین میں دراندازی کی کوشش کی لیکن وہ کسی بھی سمت میں کامیاب نہیں ہوئے۔

اس بات کی طرف اشارہ کرتے ہوئے  کہ یوکرینی  افواج  کو بھاری نقصان اٹھانے کے بعد پیچھے ہٹنا پڑا، پوتن نے اپنے خیال کا اعادہ کیا کہ ان اقدامات کا مقصد روس میں صدارتی انتخابات کو روکنا ہے۔