رواں ہفتہ جنگ میں شدت آ سکتی ہے،ہماری فوج تیار رہے:زیلنسکی

 دعویٰ کیا گیا ہے کہ یوکرینی افواج نے روس کی جانب سے ملک کے مشرقی حصے میں کیے جانے والے کئی تازہ حملے ناکام بنا دیے ہیں۔

یوکرینی صدر وولودیمیر زیلنسکی نے کہا ہے کہ رواں ہفتہ جنگ کے حوالے سے مشکل رہے گا۔

انہوں نے فوج کو پوری طرح تیار رہنے کی ہدایت کی ہے۔

خارکیف بلدیہ کے میئر ایگور تیری خوف نے بتایا ہے کہ روسی بمباری میں شدت پیدا ہو گئی ہے جسکے نتیجے میں ایک بچہ ہلاک ہو گیا ہے۔

تیری خوف نے ایک ویڈیو پیغام میں بتایا کہ خارکیف شہر کے لیے آج ایک مشکل دن تھا جس کے بعض رہائشی علاقوں اور گروکی پارک پر بمباری کی گئی ۔

یوکرینی مسلح افواج کے سربراہ نے بھی کہا کہ ہے دونیسک اور لوہانسک پر قبضے کے لیے روس نے تاحال منصوبہ بندی جاری رکھی ہوئی ہے۔ 

دوسری جانب  آسٹریا کے چانسلر کارل نیہامر آج ماسکو میں روسی صدر ولادیمیر پیوٹن سے ملاقات کر رہے ہیں۔

آسٹریا کی وزارت خارجہ کے مطابق کارل نیہامر  روسی صدر  کوجنگ بندی کے امکانات اور جنگ کے سبب پیدا شدہ خطرات سے آگاہ کریں گے۔

واضح رہے کہ  24 فروری کو روس کے یوکرین پر حملے کے بعد روسی صدر پیوٹن کے ساتھ کسی یورپی رہنما کی یہ پہلی براہ راست ملاقات ہوگی۔