سال 2020 کا اختتام، حکومتی کارکردگی پر صدارتی ترجمان کی ایک نظر

صدارتی ترجمان اور مشیر سلامتی وخارجہ پالیسی ابراہیم قالن نے کہا ہے کہ شام و عراق میں پی کےکے  اور داعش کے خلاف جنگ کامیابی سے جاری ہے۔

 صدارتی ترجمان نے ویڈیو کانفرنس کے ذریعے  سال 2020 کی حکومتی کارکردگی پر نظر ڈالی اور بتایا کہ  کورونا کے خلاف  ترکی کے شعبہ نظام صحت  نے کافی گراں قدر خدمات صرف کی ہیں،ترکی نے دیگر ممالک کو بھی اس سلسلے میں تعاون فراہم کیا ہے  جس کا سلسلہ اگلے سال بھی جاری رہے گا۔

انہوں نے کہا کہ  مشرقی بحیرہ روم اور لیبیا کے حوالے سے ترکی کی کامیاب خارجہ پالیسیوں میں  قومی مفادات و حقوق کا مکمل تحفظ کیا گیا ہے جبکہ شام و عراق میں پی کےکے اور داعش کے خلاف کاروائیوں کو بھی اسی نظریے سے جاری رکھا گیا ہے جس سے خطے میں امن و امان کی صورت حال قائم رکھنے میں مدد ملی ہے جبکہ فیتو تنظیم کے خلاف بھی ہماری جنگ آج کی طرح کل بھی جاری رہے گی ۔

 کانفرنس میں آذربائیجان  کی جانب سے بالائی قاراباغ کے دوبارہ الحاق  کی کوششوں میں ترکی کے تعاون سمیت بحیرہ اسود میں گیس کی دریافت کا بھی حوالہ دیا گیا جس کے نتیجے میں جلد ہی معاشی لحاظ سے بیرونی انحصار کم کرنے میں مدد ملے گی۔ علاوہ ازیں  ترکی اور برطانیہ کے درمیان آزاد تجارتی معاہدے سے موجودہ تعلقات میں مزید فروغ کا بھی عندیہ دیا گیا۔

 ابراہیم قالن نے یورپی یونین اور امریکہ کے ساتھ تعلقات میں  بعض علاقائی اختلافات کے حائل ہونے کی جانب توجہ دلوائی اور بتایا کہ ان کے باوجود مسائل کےحل کےلیے دو طرفہ سفارتی کوششیں جاری ہیں۔