مالی میں فوجیوں کی ہلاکت پر ترکی کا اظہار افسوس

ترکی نے مالی میں ایک فوجی  رجمنٹ پر ہونے والے اور بھاری تعداد میں فوجیوں کے ہلاک ہونے والے دہشت گرد حملے کی مذمت کی ہے۔

دفترِ خارجہ  کی جانب سے جاری کردہ تحریری اعلامیہ میں  واضح کیا گیا ہے کہ مالی کے سیگو علاقے میں  ایک فوجی  رجمنٹ  پر 14 جون کو ہونے والے دہشت گرد حملے میں  فوجیوں کی ایک کثیر تعداد کی ہلاکتوں  کی اطلاع پانے پر ہمیں سخت صدمہ پہنچا ہے۔

اعلامیہ میں کہا گیا ہے کہ ہم اس مذموم حملے کی شدید مذمت کرتے ہیں اور اس دوران اپنی جانوں سے ہاتھ دھو بیٹھنے والوں کی مغفرت اور برادر مالی عوام اور حکومت سے دلی طور پر اظہارِ  تعزیت کرتے  ہیں۔

یا د رہے کہ 14 جون کو   اس ملک میں  ہونے والے حملے کے بعد لا پتہ ہونے والے 44 فوجیوں میں سے 24 مردہ حالت میں برآمد ہوئے تھے۔