یہ منطق ناقابل فہم ہے کہ طاقتور ملک ہی ہمیشہ حق بجانب تصور کیاجائے:صدر ایردوان

 صدر رجب طیب ایردوان  نے کہا ہے کہ  طاقتور ملک ہی  ہمیشہ حق بجانب ہو  ایسا ممکن نہیں ہے۔

 صدر ایردوان  نے  استنبول میں منعقدہ ٹی آر ٹی ورلڈ فورم کی اختتامی تقریب سے خطاب کے دوران کہا کہ  اگر جمہوریت  کا دعوےدار بننا ہے  تو  دنیا کو آپس میں تعاون  کرنا ہوگا  کیونکہ دنیا  کو 5 بڑی طاقتوں کے رحم و کرم پر نہیں چھوڑا جا سکتا۔

انہوں نے    شام میں   موجود دہشت گرد تنظیم پی وائی ڈی   کو امریکی اسلحے کی فراہمی پر تنقید  کرتےہوئے کہا کہ  یہ کہاں کی دانشمندی ہے کہ  دہشتگرد تنظیموں میں امتیاز  رکھا جائے  ،یورپ بھی دہشتگرد تنظیموں  کے خلاف اپنا   قبلہ درست کرے اور موقف میں سختی لائے۔

  ترک صدر  نے خلیج  کی صورت حال   کے حوالے سے پُر امید ہوتے ہوئے کہا   قطر  کی  طرح   ترک فوجی اڈے     کے قیام  کی  پیشکش ہم نے سعودی عرب کو  بھی دی تھی  مگر  ہمیں جواب موصول نہیں ہوا ۔

عرب ممالک  کی منطق سمجھ سے بالا تر ہے کہ وہاں  دیگر ممالک تو اپنے فوجی اڈے قائم کر سکتے ہیں مگر ترکی  کو اجازت نہیں ۔

  انہوں نے  شامی مہاجرین  کی  آباد کاری کے حوالے سے کہا کہ   ترکی نے  اب تک 30 ارب ڈالرز شا می مہاجرین پر خرچ  کیے ہیں  جو کہ ہماری بر تری نہیں بلکہ اخلاقی ،دینی اور انسانی ذمہ داریوں کی عکاسی کرتا ہے ۔