یورپی یونین ترکی کا وقت ضائع کر رہی ہے، ترکی اپنے پاوں پر کھڑا ہو سکتا ہے: صدر ایردوان

ترکی کے صدر رجب طیب ایردوان نے کہا ہے کہ "یورپی یونین ترکی کا وقت ضائع کر رہی ہے، اگر یورپی یونین رکنیت قبول نہ کرنے کی بات کھلے  بندوں کہہ دے تو ترکی مطمئن ہو جائے گا"۔

صدر رجب طیب ایردوان نے برطانوی نشریاتی ادارے بی بی سی کے لئے اپنے انٹرویو میں کہا ہے کہ ترکی اپنے پاوں پر کھڑا ہو سکتا ہے۔ ہم نے اپنے وعدوں   کو پورا کیا ہے اگر یورپی یونین صاف الفاظ میں ترکی کو قبول نہ کرنے کی بات کہہ دے تو  ترکی  پُر سکون  ہو کر اپنے بی اور سی منصوبوں کا آغاز کر دے گا۔

انہوں نے کہا کہ میری وزارت اعظمیٰ کے پہلے دور میں یورپی یونین کے سربراہی اجلاسوں میں ترکی کو ایک خاموش دور سے گزرتے ہوئے ملک کے طور پر متعارف کروایا گیا لیکن اب یہی یورپی یونین ہمیں صرف سربراہی اجلاسوں میں ہی مدعو نہیں کرتی بلکہ ہمارا وقت بھی ضائع کر رہی ہے۔

صدر رجب طیب ایردوان نے کہا کہ ترکی کے عوام کی اکثریت یورپی یونین میں شامل ہونے کی خواہش مند نہیں ہے اور ترکی کے لئے یورپی یونین کے روّیے کو غیر مخلصانہ خیال کرتی ہے۔

صدر ایردوان نے مزید کہا ہے کہ   یورپی یونین کے اس روّیے کے باوجود ہم کچھ عرصہ مزید یورپی یونین کے ساتھ  مخلصانہ روّیے کو جاری رکھیں گے اور دیکھیں گے کہ اس کا ہمیں کیا فائدہ ہوتا ہے۔

انٹرویو 14 جولائی کو بی بی سی ورلڈ نیوز پر نشر ہو گا  ۔