بھارت پاکستان پر دہشت گردی کا الزام لگا کر اصل میں اپنے جرم پر پردہ ڈالنے کی کوشش کر رہا

بھارت کی طرف سے اقوام متحدہ میں  پیش کردہ پاکستان پر پابندی لگانے سے متعلق بھارتی قرار داد مسترد کر دی گئی ہے۔

پاکستان کے دفتر خارجہ کے ترجمان کے مطابق پاکستان مخالف  قرار داد کا مسترد ہونا ایک اہم فورم پر بھارتی ایجنڈے کے مسترد ہونے کا مفہوم رکھتا ہے۔

ترجمان نے کہا کہ  دہشتگردی بھارت کی ریاستی پالیسی کا حصہ ہے اور پاکستان پر الزام لگا کر نئی دہلی نے اپنے جرائم پر پردہ ڈالنے کی کوشش کی ہے۔

ترجمان خارجہ دفتر کے مطابق قرار داد مسترد ہونے سے اہم فورم کو سیاسی مقاصد کے لئے استعمال کرنے کی بھارتی خواہش ناکام ہو گئی ہے۔ بھارت خود دہشتگردی کروانے، دہشت گردی کی معاونت کرنے اور اسے وسائل فراہم کرنے میں ملوث ہے۔

انہوں نے کہا کہ انسداد دہشتگردی کے بارے میں بھارت کا کردار مشکوک ہے اور آنے والے دنوں میں ہم، اقوام متحدہ کو پاکستان میں، بھارتی مداخلت کے مزید ثبوت فراہم کریں گے۔ بھارت پاکستان پر دہشت گردی کا الزام لگا کر اصل میں اپنے جرم پر پردہ ڈالنے کی کوشش کر رہا ہے۔

واضح رہے کہ بھارت کی طرف سے سیاسی ایجنڈے کی تکمیل کے لئے جمع کروائی گئی قرار داد میں پاکستان پر داعش اور القاعدہ کی مدد کا الزام لگایا گیا تھا  جسے سلامتی کونسل کی طرف سے مسترد کر دیا گیا ہے۔