ڈرون حملے پاکستان کی خودمختاری اورسالمیت کے خلاف ہیں ، جنرل راحیل شریف

پاک فوج کے سربراہ جنرل راحیل شریف  نے کہا ہے کہ ڈرون حملے پاکستان کی خودمختاری اورسالمیت کے خلاف ہیں اور ایسے اقدامات سے پاک امریکا تعلقات متاثرہوسکتے ہیں۔

پاک فوج کے شعبہ ابلاغ عامہ کی جانب سے جاری کردہ بیان کے مطابق پاکستان میں تعینات امریکی سفیر ڈیوڈ ہیل نے آرمی چیف جنرل راحیل شریف سے ملاقات کی جس میں 21 مئی کو بلوچستان میں ڈرون حملے کے بعد کی صورتحال پرتبادلہ خیال کیا گیا۔

ملاقات کے دوران آرمی چیف نے بلوچستان میں ڈرون حملے پرسخت تشویش کا اظہارکرتے ہوئے کہا کہ اس قسم کے حملے پاکستان کی خودمختاری اور سالمیت کے خلاف ہیں۔ اس سے نہ صرف پاک امریکہ تعلقات متاثر ہوسکتے ہیں بلکہ یہ خطے میں استحکام کے لیے جاری امن عمل کے لیے بھی نقصان دہ ہیں۔ انہوں نے کہا کہ پاکستان کی دہشت گردی کے خلاف جنگ میں کوششیں، قربانیاں اور کامیابیاں غیرمتزلزل ہیں۔

واضح رہے کہ 21 مئی کو امریکا نے بلوچستان میں ایران سے آنے والی ایک گاڑی پر ڈرون حملہ کیا تھا جس کے نتیجے میں  افغانستان طالبان کے امیر ملا اختر منصور ہلاک ہوگئے تھے۔