سابق صدر پرویز مشرف کی بیرون ملک روانگی پر رد عمل
حکومت نے پرویز مشرف پر آرٹیکل6 لاگو کرنے کا کہا تھا مگر اب جانے کی اجازت دیکر پوری قوم کو شرمندہ کیا ہے
قومی اسمبلی میں حزب اختلاف کے ارکان نے سابق صدر پرویز مشرف کو ملک سے باہر جانے کی اجازت دینے پر حکومت پر کڑی نکتہ چینی کی ہے۔
انہوں نے کہا کہ پرویز مشرف پر غداری سمیت سنگین مقدمات جاری تھے ، آخر کیا ہوا کہ حکومت نے اپنی چال بدل دی، اپوزیشن نے حکومت سے اس حوالے سے ایوان میں اپنا موقف پیش کرنے کا بھی کہا ہے۔
تحریک انصاف کے رکن مراد سعید نے وفاقی وزیر احسن اقبال کی موجودگی میں ان کا نام لیے بغیر کہا کہ ایک وزیر نے دعویٰ کیا تھا کہ پرویز مشرف بیرون ملک چلے گئے تو وہ وزارت سے مستعفی ہو جائیں گے۔ لیکن آج پرویز مشرف ملک سے باہر چلے گئے ہیں لیکن وزیر نے اپنے دعوے پر کوئی عمل نہیں کیا۔
دوسری جانب وفاقی وزیر نے مراد سعید کی تنقید کا کوئی جواب دینا پسند نہیں کیا۔ ایک اسمبلی رکن عارف علوی کا کہنا ہے کہ حکومت نے پرویز مشرف پر آرٹیکل6 لاگو کرنے کا کہا تھا مگر اب جانے کی اجازت دیکر پوری قوم کو شرمندہ کیا ہے۔