یمن کے حوالے سے غیر جانبدار رہنے پر پاکستان کو سخت انتباہ

متحدہ عرب امارات کے وزیرِ خارجہ ڈاکٹر انور محمد قرقاش نے پاکستان کے یمن کے تنازعے میں غیر جانبدار رہنے کے فیصلے پر پاکستان کو خبردار کرتے ہوئے کہا ہے کہ پاکستان کو اس اہم مسئلے پر متضاد اور مبہم رائے کی بھاری قیمت چکانی پڑے گی۔
سماجی رابطے کی ویب سائٹ پر اپنی ٹوئٹ میں ڈاکٹر انور قرقاش نے کہا ہے کہ سعودی عرب کی قیادت میں یمن میں حوثی باغیوں کے خلاف جاری آپریشن میں شامل نہ ہونے کے حوالے سے پاکستان کی پارلیمنٹ کی قرارداد غیر متوقع ہے۔ پاکستان کے لئے بہتر ہے کہ وہ خلیجی ریاستوں کے ساتھ اپنے تعلقات کے حوالے سے واضح موقف اپنائے کیونکہ اسے مبہم موقف کی بھاری قیمت ادا کرنی پڑسکتی ہے۔
انور قرقاش کا مزید کہنا تھا کہ خلیج عرب اس وقت انتہائی نازک دوراہے پر کھڑاہے۔ پاکستان اور ترکی کے مبہم مؤقف سے ثابت ہوتا ہے کہ لیبیا سے یمن تک کی سلامتی کی ذمہ داری صرف اور صرف عرب ممالک پر ہی عائد ہوتی ہے، ایسا محسوس ہوتا ہے کہ دونوں ممالک کے لئے ایران کی اہمیت خلیجی ممالک سے زیادہ ہے۔
پاکستان کے دفتر خارجہ کی ترجمان تسنیم اسلم نے بی بی سی سے بات کرتے ہوئے کہا کہ وہ اماراتی وزیر خارجہ کے بیان پر تصبرہ کرنے سے قاصر ہیں کیونکہ ان کے پاس اس بارے میں مکمل معلومات نہیں ہیں۔انھوں نے اس ضمن میں مزید کوئی بات کرنے سے بھی انکار کیا۔