اسرائیل: وزیراعظم نے وزیر دفاع کی بر طرفی ملتوی کردی

اسرائیلی وزیر اعظم بن یامین نیتن یاہو نے وزیر دفاع یوو گیلنٹ کی برطرفی کو ملتوی کر دیا ہے۔

سرکاری نشریاتی ادارے  کان نے بتایا ہے کہ انہوں نے سلامتی کی پیچیدہ صورتحال کے پیش نظر یہ اقدام کیا ہے۔

یاد رہے ایک ہفتہ قبل  یوو گیلنٹ کو حکومت کی عدالتی اصلاحات کی مخالفت کرنےکے بعد برطرف کردیا گیا تھا۔

 بتایا  گیا ہے کہ سلامتی صورتحال میں پیش رفت کو دیکھتے ہوئے نیتن یاہو وزیر دفاع کے معاملے پر اب بعد میں غور کریں گے۔

اس حوالے سے وزیر اعظم کے دفتر سے فوری طور پر کوئی تبصرہ نہیں کیا گیا۔

نیتن یاہو کے ایک معاون نے ایک روز قبل بتایا تھا کہ وہ نتین یاھو گیلنٹ کے ساتھ اسرائیلی افواج کا دورہ کریں گے۔

اسرائیلی وزیر اعظم یوو گیلنٹ کی برطرفی کے فیصلے کو آگے بڑھانے سےرک گئے ہیں اور دونوں میں مفاہمت کا بھی امکان پیدا ہوگیا ہے۔

26 مارچ کو وزیر دفاع کی برطرفی کا اعلان کیا گیا تھا، ان کی برطرفی کے بعد نیتن یاھو حکومت کی مجوزہ عدالتی اصلاحات کے خلاف عوامی احتجاج مزید بھڑک گیا تھا بالآخر نیتن یاھو نے اپنی متنازع ترامیم کو معطل کردیا تھا۔

سیاسی ذرائع نے بتایا کہ نیتن یاہو اور گیلنٹ کے درمیان تناو کو ختم کرنے کے لیے حالیہ دنوں میں کوششیں کی گئی ہیں۔