شامی سفیر کی کذب بیانی پکڑی گئی،دکھائی گئی تصویر عراق کی نکلی

شامی صدر بشارالاسد اور ان کے    ہمنوا سن 2011 کے اوائل سے ملک میں جاری خانہ جنگی کے بارے میں کذب بیانی سے تو کام لیتے ہی چلے آرہے ہیں لیکن اقوام متحدہ میں متعین شامی سفیر بشارالجعفری نے ان سب کو حسبِ سابق ایک مرتبہ پھر مات  دے دی ہے ۔

وہ ماضی میں بھی اقوام متحدہ کے اجلاسوں میں بشارالاسد کے دفاع میں بڑے بڑے جھوٹ بول چکے ہیں لیکن منگل کی رات  تو انھوں نے اقوام متحدہ کی سلامتی کونسل میں  حد کر  دی اور  ہمسایہ  ملک عراق کے فوجیوں کی تصاویر پیش کردیں مگر ان کے بارے میں یہ دعویٰ کیا کہ شامی فوجی حلب میں شہریوں کی امداد کر رہے ہیں ۔

ان تصاویر کی حقیقت یہ ہے کہ وہ جنگ سے تباہ حال حلب کی نہیں تھیں بلکہ عراق کی تھیں

۔یہ تصاویر گزشتہ سال عراقی اخبارات میں شائع ہوئی تھیں اور ان میں عراقی فوجی کسی جنگ زدہ علاقے میں شہریوں کی مدد کرتے ہوئے دیکھے جاسکتے ہیں۔

بشارالجعفری نے کسی تصدیق کے بغیر ہی یہ دعویٰ کردیا کہ یہ صدر بشارالاسد کے وفادار فوجیوں کی تصاویر ہیں جو حلب میں شہریوں کی مدد کو آئے ہیں۔

اس طرح انھوں نے سلامتی کونسل کے رکن ممالک کے نمائندوں کو یہ باور کرانے کی کوشش کی کہ اسد نواز  فوج اپنے شہریوں کے خلاف لڑ نہیں رہی ہے بلکہ ان کی دل جوئی کررہی ہے اور جنگ سے متاثرہ افراد کی مدد کو پہنچ رہی ہے۔