سری لنکا کی پوزیشن مستحکم

پاکستان اور سری لنکا کے درمیان کھیلے جانے والے کولمبو ٹیسٹ کے دوسرے روز میزبان ٹیم نے 9 وکٹوں کے نقصان پر 304 رنز بنا لئے ۔
میچ کے دوسرے روز میزبان سری لنکا نے اپنی نامکمل اننگز 70 رنز ایک وکٹ کے نقصان سے دوبارہ شروع کی تو کمارسنگاکارا 18 اور کشال سلوا 21 رنز کے ساتھ کریز پر موجود تھے اور جب ٹیم کا مجموعہ 98 تک پہنچا تو سنگاکارا 34 رنز بنا کر ذوالفقار بابرکا شکار بن گئے۔
چوتھی وکٹ پر کشال سلوا اور کپتان انجیلو میتھیوز نے شاندار بیٹنگ کرتے ہوئے 72 رنز کی شراکت قائم کی اور191 کے مجموعی اسکور پر سلوا 80 رنز بنا کر آؤٹ ہوئے۔
اس سے قبل قومی ٹیم کے کپتان مصباح الحق نے ٹاس جیت کر پہلے بیٹنگ کا فیصلہ کیا جو سود مند ثابت نہ ہوا اور پوری ٹیم 138 رنز پر پویلین لوٹ گئی اور6 بیٹسمین ڈبل فیگر تک پہنچنے میں ناکام رہے ۔محمد حفیظ 42 اور اظہرعلی 26 رنز کے ساتھ نمایاں بلے باز رہے۔ سری لنکا کی جانب سے تھرینڈو کوشال نے 5 وکٹیں لیں۔