عالمی کپ میں برازیل کو تاریخی شکست

برازیل میں کھیلے جانے والے عالمی کپ کا سیمی فائنل فٹ بال کی تاریخ کے لیے ایک دھچکے سے کم ثابت نہ ہوا۔
ٹورنا منٹ کی میزبان اور فیورٹ ٹیم برازیل کو اپنی تاریخ کی بد ترین شکست سے دو چار ہونا پڑا۔
میچ کا آغاز توقع کے مطابق ہوا لیکن کچھ ہی دیر بعد جرمن ٹیم نے برازیلی گول پر حملے شروع کر دیے۔ اور اس نے میچ کے پہلے ہی کارنر میں بڑی آسانی سے پہلا گول اسکور کر دیا۔
برازیلی ٹیم ابھی اس گول کے اثر سے نکل نہ پائی تھی کہ دوسرا گول ہو گیا۔ پھر تیسرا۔۔۔۔
پہلے تیس منٹ میں جرمنی نے مجموعی طور پر پانچ گول کرتے ہوئے برازیلی ٹیم کی کمر توڑ کر رکھ دی۔ پہلا ہاف پانچ۔ صفر کے اسکور سے اختتام پذیر ہوا۔
دوسرے ہاف کے آغاز کے ساتھ برازیل نے کئی بار گول کرنے کا موقع حاصل کیا لیکن جرمن گول کیپر نے ان کی تمام تر کوششوں کو ناکام بنا دیا۔
جس پر جرمن ٹیم نے مزید تھوڑی کوشش کے ساتھ چھٹا گول کردیا۔ اور پھر ساتواں گول۔ اس میچ کو دیکھنے والے تماشائیوں کو ایک طرف چھوڑیں ، دنیا بھر میں ٹی وی کے سامنے بیٹھے ناظرین کی آنکھیں حیرت کے مارے کھلی کی کھلی رہ گئیں۔ ٹھیک سات گول ۔۔
خیر برازیل نے ایک گول اسکور کر ہی لیا۔ جس کے بعد مزید کوئی گول نہ ہوا اور جرمنی واضح برتری کے ساتھ فائنل میں پہنچنے میں کامیاب ہو گیا۔
دوسرا سیمی فائنل کل شب ہالینڈ اور ارجنٹائن کے درمیان کھیلا جائیگا۔