سری لنکا میں ڈرون طیارے ممنوع قرار دے دئے گئے
ڈرون طیاروں پر پابندی کا فیصلہ ملک میں موجودہ سکیورٹی صورتحال کے پیش نظر کیا گیا ہے: سری لنکا سول ایوی ایشن
![سری لنکا میں ڈرون طیارے ممنوع قرار دے دئے گئے](http://cdn.trt.net.tr/images/xlarge/rectangle/e573/5616/29bc/5cc15b122cf30.jpg?time=1719145977)
سری لنکا میں گذشتہ ہفتے کے اواخر میں ہوٹلوں اور کلیساوں پر دہشتگردی کے حملوں کے بعد ملک میں ڈرون طیاروں کو ممنوع قرار دے دیا گیا ہے۔
سول ایوی ایشن ادارے نے جاری کردہ بیان میں کہا ہے کہ ڈرون طیاروں پر پابندی کا فیصلہ ملک میں موجودہ سکیورٹی صورتحال کے پیش نظر کیا گیا ہے۔
اس دوران سری لنکا کی پولیس ملک میں دھماکہ خیز مواد کی تلاش کا کام جاری رکھے ہوئے ہے ۔
اس دائرہ کار میں آج دارالحکومت کولمبو سے 35 کلو میٹر مشرق میں واقع علاقے پوگوڈا کے ایک کوڑا دان سے ملنے والے مشتبہ مواد کو ناکارہ بنایا گیا ہے۔
واضح رہے کہ سری لنکا میں ایسٹر کے موقع پر 3 کلیساوں اور 3 فائیو اسٹار ہوٹلوں پر خود کش حملوں اور کولمبو کے نواحی علاقوں میں مزید 2 بم حملوں کے نتیجے میں 359 افراد ہلاک اور 500 سے زائد زخمی ہو گئے تھے۔
حملوں سے متعلق حراست میں لئے جانے والے مشتبہ افراد کی تعداد 58 تک پہنچ گئی ہے۔
واضح رہے کہ بم حملوں کی ذمہ داری دہشت گرد تنظیم داعش نے قبول کر لی تھی۔