امریکہ نے شمالی کوریا کے دو سائنسدانوں پر پابندی لگا دی

امریکہ کے مشیر خزانہ  اسٹیون نوچن کا کہنا ہے کہ امریکہ  کی جانب سے کیا جانے والا اقدام شمالی کوریا پر دباؤ برقرار رکھنے کی مہم کا حصہ ہے تاکہ شمالی کوریا کو تنہا کیا جائے اور پیانگ یانگ کو جوہری صلاحیت سے پاک رکھا جائے۔

امریکی  محکمہ خزانہ کے مطابق ،پابندی کی زد میں آنے والوں میں کم جانگ سک اور ری پیونگ چول شامل ہیں جبکہ کم جانگ سک کا کردار شمالی کوریا کے جوہری پروگرام کو مائع حالت سے ٹھوس ایندھن میں منتقل کرنے کا ہے جب کہ ری پیونگ بین البراعظمی بیلسٹک میزائل پروگرام کے اہم فرد ہیں۔

امریکہ کی جانب سے لگائی جانے والی پابندی کے بعد شمالی کوریا کی دونوں شخصیات امریکہ  کی حدود میں  جائیداد  یا کوئی مفاد نہ رکھ سکیں گے جب کہ ان کا کسی بھی امریکی شہری سے لین دین  بھی ممنوع ہوگا۔

ماہرین کا کہنا ہے کہ ری پیونگ شمالی کوریا کے میزائل پروگرام مزدور پارٹی کے نمائندے ہیں جو کم جانگ ان کے قابل اعتماد مشیر بھی ہیں جنہیں کئی مرتبہ پیانگ یانگ کی جانب سے جاری کردہ تصاویر میں ان کے ساتھ دیکھا گیا ہے۔

جب کہ کم جانگ سک راکٹ سائنس پر عبور رکھتے ہیں جو پہلی مرتبہ 2012 میں اس وقت منظرعام پر آئے جب شمالی کوریا نے کامیاب راکٹ تجربہ کیا تھا۔