بھارت میں مون سون کی شدید بارشوں کے نتیجے میں 48 افراد ہلاک

بھارت میں مون سون کی شدید بارشوں کے نتیجے میں آنے ہونے والے سیلابوں اور لینڈ سلائیڈنگ کی زد میں آ کر کم از کم48 افراد مارے گئے ہیں۔

 بتایا گیا ہے کہ بھارتی ریاست راجستھان میں کم از کم چار اضلاع مکمل طور پر زیرآب ہیں، جہاں ہزاروں افراد بلند عمارتوں کی چھتوں پر پناہ لیے ہوئے ہیں۔ بدھ کے روز تک راجستھان میں بارشوں کی وجہ سے ہلاکتوں کی تعداد 19 ہو چکی ہے۔ ادھر گجرات میں بھی موسلادھار بارشوں کی وجہ سے 29 افراد ہلاک ہو چکے ہیں۔

ریاست آسام میں سیلاب سے ڈھائی ہزار سے زائد دیہات صفحہ ہستی سے مٹ گئے.حکام کا کہنا تھا کہ گزشتہ دو ہفتوں کے دوران ہونے والی  طوفانی  بارشوں کے باعث علاقے میں بہنے والے سب سے بڑے دریا برہم پترا سمیت کئی چھوٹے دریاوں میں بھی پانی کی سطح خطرے کا نشان عبور کرگئی ہے جس سے مزید علاقوں کے زیرِ آب آنے کا خطرہ بڑھ گیا ہے۔ریاست آسام میں امدادی سرگرمیوں کے نگران ادارے کا کہنا تھا کہ بارشوں اور سیلاب سے گھروں کے علاوہ کئی اضلاع میں کھڑی فصلوں، سڑکوں، پلوں اور دریاوں اور نہروں کے پشتوں کو بھی نقصان پہنچا ۔

حکام نے مون سون کے دوران مزید بارشوں کی پیش گوئی کے پیشِ نظر مزید علاقوں کے زیرِ آب آنے اور متاثرہ افراد کی تعداد میں اضافے کا خدشہ ظاہر کیا ہے۔برِ صغیر میں مون سون کا موسم جون سے ستمبر تک جاری رہتا ہے جس کے دوران سیلاب کا آنا معمول ہے۔

مون سون کے حالیہ سلسلے کے بعد سے اب تک بھارت میں بارشوں کی وجہ سے ہونے والی ہلاکتوں کی تعداد 83 تک پہنچ چکی ہے۔